ИТАЛИЈАНСКИОТ МОТОЦИКЛИСТ АНДРЕА ДОВИЦИОЗО СЛАВЕШЕ НА ПРВАТА ТРКА ОД НОВАТА СЕЗОНА НА СВЕТСКОТО MОТОЦИКЛИСТИЧКО ПРВЕНСТВО ВО ТАКАНАРЕЧЕНАТА „КРАЛСКА КЛАСА“, ПРИ ШТО ЗА ТРИУМФОТ ДО ПОСЛЕДНИОТ КРУГ МУ ПАРИРАШЕ АКТУЕЛНИОТ СВЕТСКИ ШАМПИОН, МАРК МАРКЕЗ.
Во речиси идентичен манир како што заврши минатата сезона, стартуваше новото поглавје од борбата за светската титула меѓу хероите на две тркала. Андреа Довициозо од Дукати и Марк Маркез од Хонда го имаа главниот збор во трката и при распределбата на местата на пиедесталот. Возачот на Дукати успеа да го зачува водството до кое дојде по „колапсот“ на Маверик Вињалес кој ја имаше пол позицијата, а Маркез иако се обидуваше, не успеа да направи чудо и да му ја украде победата на Довициозо. Во групата возачи зад нив на крајот до третото место стигна ветеранот Кал Крачлоу.
Иако се очекуваше во трката да се појават и други возачи со победнички аспирации, пред сè пилотите на Јамаха, Вињалес и Роси, во реалноста тоа не се случи. Маверик Вињалес ја започна новата сезона на мошне ветувачки начин, освојувајќи ја пол позицијата со време од 1:53.546 кое беше само две десетинки до рекордот на патеката поставен од Марк Маркез (1:53.380). Сепак, на стартот од трката тој падна на седмо место, а што е уште почудно, остана на таа позиција речиси цела трка! Валентино Роси, кој испадна во првата квалификациска сесија, на крајот дојде до петтото место, престигнувајќи го Вињалес во текот на трката. Исто така, многу се очекуваше и од Хорхе Лоренцо, кој се префрли од Дукати во Хонда, но барем оваа прва трка покажа дека тој сè уште ја нема достигнато врвната форма по операцијата во текот на зимата.
Така, дуелот на Довициозо и Маркез остана во фокусот, како што впрочем беше и на повеќето трки од финишот на ланската сезона, но и по свеченото прогласување следеше „второ полувреме“ на зелената маса. Имено, откако го доби првото место за само 0.023 секунди, но овој триумф беше вложен заеднички протест од страна на Априлија, Хонда, КТМ и Сузуки. Основата за жалбата беа поради аеродинамични додатоци кои ги имале тројцата возачи на Дукати.
Сепак, стјуардите ги одбија ваквите жалби против Дукати, па победата на Андреа Довициозо останува кристално чиста. По трката победникот Андреа Довициозо му честиташе на Маркез за неверојатната борба во последните делници од патеката во Катар.
– На крајот доби шанса да ме претрка во негов стил. Тој е доволно добар да се обиде да те помине и кога има помала брзина. Сепак, јас бев во можност да одговорам на правилен начин затоа што моето забрзување беше навистина добро. Убаво е да се победи против шампионот. Само Марк е способен да го направи тоа ,– коментираше Довициозо по крајот на трката.
Честитки за италијанскиот мотоциклист стигнаа и од второпласираниот Маркез кој истакна дека не сака да ја добие трката на „зелена маса“.
– Го дадов максимумот на патеката. Денес имаше друг мотоциклист кој беше побрз од мене, а тоа беше Довициозо. Тој ме победи на патеката ,– гласеше коментарот на Маркез. Од друга страна, пак, Валентино Роси кој заврши на петтата позиција на трката истакна дека Јамаха речиси и да нема некој посериозен напредок од минатата сезона.
– Се чувствував добро на моторот и уживав во напредувањето за време на трката, што значи дека не е толку лошо. Проблемот е тоа што горе-долу сме исти како минатата сезона. Се трудев да стигнам до подиумот, но не бев доволно силен,- истакна 40. годишниот мотоциклист кој е жива легенда на овој спорт. Следната трка се вози 31 март за Големата награда на Аргентина.
ТОП НОВОСТИ
