ДОДЕКА ЕВРОПА ВЕЌЕ БЕШЕ ВО ПАНИКА ОД ШИРЕЊЕТО НА КОРОНАВИРУСОТ, ФОРМУЛА Е ЈА ПРОДОЛЖИ ИНТЕРКОНТИНЕНТАЛНАТА ТУРНЕЈА СО ТРКАТА ВО МАРОКО.
Oткако сезоната стартуваше со две трки во Саудиска Арабија, епизодите во Чиле и Мексико донесоа до првичен заплет кој резултираше со основа за големо шоу во Маракеш. Судбината сакаше ова да е последна извозена трка пред прекинот што уследи во средината на март и ги запре сите спортски активности на сите континенти.
Победата на Мич Еванс во Мексико Сити беше пример дека и во оваа сезона на пиедесталот се менуваат лицата на возачите како и во претходните години: тој беше четврти по Сем Бирд, Александер Симс и Максимилијан Гинтер што го подигна побединичкиот пехар. Имајќи предвид дека и на последните четири трки од минатата година се случија трки со различни победници, се добива низа од 8 трки во кои нема повторување на еден возач на највисокото место на пиедесталот. Оттука, за очекување беше заплет во кој повеќе возачи ќе се борат за почестите во Мароко, а тоа кулминираше со една од најизедначените квалификациски сесии видени досега. На тоа претходеа слободните тренинзи во кои Антонио Феликс да Коста и Мич Еванс се етаблираа како рани фаворити за пол позицијата, поставувајќи најбрзи времиња во подготовките. Но, во квалификациите на првите шест места се најдоа шест возачи од шест различни екипи, набиени во интервали од две десетинки. Гинтер со БМВ Андрети имаше време од 1:17.562, пред Лотерер, Мортара и да Коста, сите во иста десетинка, додека Мич Еванс кој владееше на последните квалификации, овој пат задоцни со започнувањето на кругот за помалку од половина секунда по што беше јасно дека ќе стартува од последниот ред.
Таканаречената борба за супер пол позиција во која учествуваат само шестемина најбрзи од квалификациите, донесе уште една епска пресметка во која тројца возачи се подобрија за четири десетинки. На крајот, Антонио Феликс да Коста со време од 1:17.158 изби на првото место, а Гинтер беше зад него 69 илјадити делови од секундата, додека Лотерер се доближи на 95 илјадитинки.
За возачот на ДС Течита ова беше прва пол позиција со новиот тим, за што доби и 3 поени кои ќе му се најдат во генералниот пласман, а за што се чини треба да му заблагодари на Гинтер од БМВ Андрети, кој имаше побрзо време од него на средина од патеката, но поради блокирање на сопирачките во претпоследниот свиок се најде на втората позиција.
Она што беше силна страна на возачите од ДС Течита во оваа сезона е дека во неколку наврати покажаа одлична брзина во трка и напредок од пониските кон повисоките позиции. Овој пат, со пол позицијата во негови раци, Антониот Феликс да Коста беше главниот фаворит за триумф и тој успеа да им избега на ривалите веднаш по стартот, додека групата зад него остана по ист редослед како на квалификациите. Мич Еванс кој во Маракеш дојде како лидер во генералниот пласман по киксот во квалификациите имаше интересна трка во која напредуваше цели 18 позиции или од 24 до 6 место. Вториот возач на ДС Течита, Жан Ерик Верње, исто така, напредуваше од 12. место, па тие двајца го дадоа потребниот „штимунг“ на трката.
Андре Лотерер прв испадна од водечката тројка, бидејќи беше престигнат од Ник де Вријс, но потоа Холанѓанецот доби казна за прекумерна употреба на енергија и падна на последната позиција. Во тој период од средишницата, Верње кој беше шести успеа да го мине Себастијан Буеми, а веднаш потоа и Мортара и Лотерер, со што се искачи до третото место.
Следуваше најдраматичниот дел од трката во кој возачите ги искористија своите адути скриени во активирањето на дополнителна енергија, односно уфрлија во таканаречен „напаѓачки мод“ кој им овозможува 35 киловати повеќе енергија. Лотерер го врати третото место од Верње, а Гинтер го престигна да Коста, па овој мораше да ја брани и втората позиција од забревтаниот Германец во болидот на Порше. Но, потоа следеше реванш, па возачите на ДС Течита активираа „атак мод“ и Антонио Феликс да Коста се врати во водство пред Гинтер, а Жан Ерик Верње повторно го престигна Лотерер, па се доближи и до првите двајца и успеа да се протне на второ место.
Сепак, на негова несреќа, енергијата од неговиот електромотор исчезна токму додека траеше последниот круг и тој мораше да го пропушти Гинтер и да се откаже од „еден-два“ победата за неговиот тим. На крајот Верње беше 12 секунди зад победникот и го сочува пласманот на подиумот пред Себастијан Буеми и Едоардо Мортара, додека Мич Еванс стигна од последното место до шестата позиција. На овој начин се случи првите двајца на стартот да финишираат како прв и втор во трката, што е само деветти ваков случај во шест годишната историја на Формула Е, со вкупно 63 трки (или само една седмина)! Третопласираниот Верње кој оваа година за првпат се качи на подиумот, стана 11. различен возач во пет трки кој финиширал меѓу најдобрите тројца.
Трката во Мароко беше прва по пауза од 20 трки на која не беше имплементирано возило за безбедност, па поради тоа беше постигнат нов рекорд во просечна брзина на победникот од 129,157 километри на час. За Антонио Феликс да Коста ова е трета победа во кариерата со трета различна екипа, при што досегашниот лидер на тимот Верње има 8 победи за ДС Течита. Во пресрет на продолжението на сезоната, тој го презема водечкото место во генералниот пласман со 11 бода повеќе од Мич Еванс (67:56). Двајцата возачи на БМВ Андрети, Александар Симс и Максимилијан Гинтер се речиси изедначени во дуелот за третото место, при што Симс води за два бода (46:44). Лукас ди Граси од Ауди и Стофел Вандорн од Мерцедес ја чекаат својата шанса со по 38 бода.
НАЈУСПЕШНИТЕ ПРЕСТИГНУВАЧИ ГО ПРАВАТ ШОУТО Лошата среќа на поранешниот шампион Лукас ди Граси направи тој досега да нема ниту една победа, но затоа ги соборува статистичките рекорди во престигнување. Само оваа сезона, за пет трки, тој има направено 37 успешни престигнувачки маневри, односно остварено подобри пласмани на крајот отколку на стартот од трката. Но, тој не е единствената сјајна ѕвезда. Мич Еванс со напредокот до 24 до 6 место во Маракеш беше вистинска сензација, но неговата екипа јагуар има слични постигнувања и со вториот возач Џејмс Каладо. Тој во два наврати оваа година имаше напредок од 13 места (втората трка во Саудиска Арабија) и 10 места (во Чиле). Досега, Еванс има 7 трки во кариерата на кои напредувал 10 или повеќе места, а Лукас ди граси и Жером Д`Амброзио се рекордери со по 8 трки од таков тип!
ПРОДОЛЖУВАЊЕ НА СЕЗОНАТА 2019/2020 Менаџментот на оваа тркачка серија на 13 март го стопираше првенството откако првично беа откажани само трките во Кина, Јужна Кореја и Индонезија, но потоа дојдоа на ред и трките во Европа каде што се откажаа предвидените настани во Рим и Париз. Според сегашните прогнози, трките од светското првенство на Формула Е ќе се вратат повторно од 21 јуни кога на програмата е тркачкиот викенд во Берлин. За јули беа планирани три трки, од кои една во Њујорк и две во Лондон, но неизвесно е дали тие ќе се одржат воопшто, или по најавениот календар. Се очекува во средината на мај да биде донесена нова одлука, бидејќи кога беше објавен прекинот на 13 март, беше најавен како двомесечна пауза.
ТОП НОВОСТИ
