МАКС ФЕРСТАПЕН ЈА ЗАПОЧНА СЕЗОНАТА СО УБЕДЛИВИ ПОБЕДИ, НО ОД ШПАНСКОТО ГРАН ПРИ ДО ОНА ВО БРАЗИЛ СЕ НАЈДЕ НА МАРГИНИТЕ, ПРИ ШТО КОНКУРЕНТИТЕ МУ СЕ ДОБЛИЖИЈА И ГО ЗАГРОЗИЈА НЕГОВИОТ ПОХОД КОН ТИТУЛАТА, НО ПОПЛАВАТА НА ПАТЕКАТА ИНТЕРЛАГОС ГО ВРАТИ ХОЛАНЃАНЕЦОТ КАКО ГЛАВЕН ФАВОРИТ
Летните трки минаа во знак на подемот на Мекларен, со неколку победи на Ландо Норис и Оскар Пјастри, но со првите есенски денови своја ренесанса доживеа и Ферари, па Шарл Леклер и Карлос Саинц повторно почнаа да победуваат. Фактот дека токму црвените болиди ги однесоа победите на американското и мексиканското гран при, го исфрли на површина прашањето дали навистина тие се недостижни во нормални (суви) временски услови. Сето ова требаше да биде одговорено на соодветен начин, низ трките планирани за време на гран при викендот во Бразил. Дополнително, на патеката Интерлагос беше предвидено да се вози и петтата спринт трка за 2024 година (последна ќе биде онаа во Катар), со што овие две трки поради можноста за освојување повеќе бодови отколку вообичаено, ќе бидат значајни за конечниот изглед на табелата.
За да биде ситуацијата полоша за Ферстапен, неговата „негативна серија“ беше надополнета со две казни од по 10 секунди на трката во Мексико поради опасно возење и попречување на престигнувањето од Ландо Норис како директен ривал за титулата, по што Леклер ги престигна обајцата. Одејќи за Бразил, неговиот тим објави дека поради „исцрпеност“ ќе го замени агрегатот во неговиот болид, бидејќи сносел дел од вината за лошите перформанси на последните трки. Со тоа, уследи уште една казна овој пат изразена како „пет места на стартот“ во главната трка во Бразил. Почетокот на гран при викендот одеше целосно во корист на Ландо Норис, кој во Бразил пристигна со 47 поени дефицит во генералниот пласман. Квалификациите за спринт трката ги исфрлија возачите на Мекларен на првите две позиции, при што Пјастри во финишот успеа да се избори за првото место. Ферстапен беше четврти, зад Леклер, но успеа да го престигне возачот на Ферари по 18 од 24 круга во спринтот. Тогаш, поради аплицирање на виртуелно возило за безбедност, Мекларен реши да употреби тимски наредби и Пјастри го пропушти Норис, па во рестартот Ферстапен иако се обиде, не успеа да му се доближи на ривалот. Со овој резултат, Норис освои 8 бода, а Ферстапен иако заврши трет, на крајот доби казна од стјуардите за тоа што го почнал обидот за престигнување на Пјастри уште за време на виртуелното безбедносно возило, па со аплицирање на тие казнени секунди, падна од трето на четврто место и освои само пет бода. Така, Норис дојде до 44 бода до ривалот за шампионскиот наслов.
Не сум горд на оваа победа. Ова не е тоа како што јас сакам … Не сум горд во основа. Ќе треба да работам понапорно и да завршам подобра работа во квалификациите, за да бидам во подобра ситуација за трката, рече Норис. Драмата започна кога требаше да се одржат квалификациите за главната трка. Наместо тоа, силниот дожд создаде поплава и квалификациите по долго чекање беа поместени за в недела наутро. И покрај тоа, дождот повторно беше присутен и влијаеше на пласманот во квалификациите, поради тоа што постојано имаше прекини, а во продолжувањето се возеше најчесто во поинакви временски услови. Така, по неколку прекини и изненадувања, Ландо Норис ја освои пол позицијата, а Ферстапен се најде на 12 место, што по аплицирањето на казната стана 17 место во стартниот поредок. Но, трката се возеше исто како и квалификациите, со чести прекини поради излетувања и останати болиди на патеката. Во неа, Ферстапен демонстрираше одлична контрола и успеа да ги мине сите препреки, напредувајќи од опашката на колоната до самиот врв односно од 17 до 1 место. Ландо Норис во два наврати имаше нестабилности кои доведоа да загуби некоја позиција и на крајот заврши на шесто место, освојувајќи само 8 бода.
Ферстапен освен што победи во трката, освои дополнителен поен за возење на најбрзиот круг. Во таа мисија, му помогна и прекинот на трката по инцидентот на Колапинто, кој го уништи болидот на Вилијамс излетувајќи во ѕидот (откако тоа го направи и во квалификациите), а при тој прекин заштеди на едно влегување во бокс, бидејќи доби нов сет на интермедија пневматици, што му конвенираше во стратегијата. Уште поголемо изненадување беа второто и третото место на Окон и Гасли, двајцата Французи во болидот на Алпин, кои во овој случај освоија 33 бода (18 за второ и 15 за трето), што е двојно повеќе од оние 16 кои ги имаа во досегашниот дел на сезоната.
Моите емоции денес одеа од крајност во крајност. Најпрвин сакав да ја демолирам гаражата по предвремениот прекин во квалификациите, за потоа да победам во трката. Многу ми помогна добриот старт, за потоа да продолжам да се искачувам поминувајќи по некој возач во текот на трката. Ова беше долга трка и во неа донесовме неколку исправни одлуки. Бев среќен што можам да го задржам возилото на патеката. Во одредени моменти беше неподносливо, делуваше како да возиш глисер, рече победникот на крајот од трката. Обезбедувајќи поголема предност по овој викенд, тој дополни дека би сакал да има трки без инциденти до крајот на годината, како и дека сега би требало да бидат рамноправни противници со останатите на патеката. Говорејќи за тоа како ја започна трката во водство, но сепак работите добија поинаков тек откако тој најпрво влезе во бокс, а потоа трката беше прекината и на неговите ривали им беше дозволено да добијат нови гуми, Ландо Норис рече дека победата на Макс Ферстапен е неоспорна, но дека во лошите временски услови тој самиот направил грешки поради кои загубил подобар пласман.
Одлуката да влезам во бокс беше исправна во тој момент, не жалам за тоа. Правилото е такво какво што е, сите возачи велат дека не им се допаѓа, но сепак тоа правило важи за сите. Јас направив сè што можев и тоа е тоа. Макс победи во трката, но тоа не менува ништо за мене. Тој беше далеку побрз и веројатно ќе ме престигнеше за цел круг. Целиот викенд беше „горе да направам ништо повеќе, веројатно Џорџ Расел би можел да се чувствува како победник, тој најмногу заслужи. Јас веројатно ќе завршев трет и Макс ќе победеше секако. Но, јас направив неколку грешки и тие ме чинеа неколку позиции на крајот, самокритички изјави Норис.
До крајот на сезоната има уште три гран при викенди: Лас Вегас, Катар и Абу Даби, со тоа што на пателата Лусаил крај Доха ќе има и спринт трка. Тоа значи дека максимум уште 86 бода се возможни за освојување (доколку се освојат сите победи и најбрзи кругови), а сега предноста на Ферстапен во однос на Норис изнесува 62 бода (392 наспроти 331 поен, по трката во Бразил). За да продолжи дуелот за титулата, на Ландо Норис во Вегас ќе му биде потребно да освои три бода повеќе од Ферстапен, а доколку Холанѓанецот победи во трката низ улиците на Вегас, тогаш ќе ја „запечати“ четвртата титула во низа. Многу понеизвесно е прашањето во конкуренција на конструкторите. Мекларен сега води на табелата со 593 бода, Ферари има 557, додека Ред Бул е трет со 544 поени. Мерцедес е осамен на четвртото место со 382 бода, додека Астон Мартин на петтото место има 86 поени. Пласманот на конструкторите претставува основа за распределба на парите од ТВ правата кои се заработени во текот на сезоната.
ТОП НОВОСТИ
