ЧЕШКИОТ ПИЛОТ БЕШЕ ДИСКВАЛИФИКУВАН ОД ПРВИТЕ ДВЕ ТРКИ ПОРАДИ ИЗВЕСНИ НЕРЕГУЛАРНОСТИ КОИ ЖИРИТО ГИ ОТКРИ ДОПОЛНИТЕЛНО, НО УСПЕА ДА ПОКАЖЕ КОЈ Е КОЈ ВО ДИРЕКТНИТЕ ДУЕЛИ СО КОНКУРЕНТИТЕ И ДА ЈА ЗАЧУВА ПРИСЕБНОСТА ДО ПОСЛЕДНОТО ФИНАЛЕ ВО 2018 ГОДИНА.
Домаќин на последната трка од сезоната во светскиот шампионат Red Bull Air Race беше автодромот „Тексас Мотор Спидвеј“ во Форт Ворт, САД, каде што авионите кои летаат со 370 километри на час, го донесоа дуелот на тројца изедначени пилоти на врвот на табелата. Меѓу нив и домашниот американски херој Мајкл Гулилијан, кој со победата на претходната трка во Индијанаполис на финалето од сезоната дојде како водечки на табелата.
Откако се бореа над земја и море, низ три континенти, од отворањето на сезоната во февруари, Американецот Мајкл Гулијан, Чехот Мартин Шонка и Австралијанецот Мат Хол беа „набиени“ на врвот на генералниот пласман во интервал од само седум поени! Автодромот „Тексас Мотор Спидвеј“ е импресивната патека за НАСКАР и ИндиКар трките со подмолни, турбулентни ветрови, а веќе беше домаќин на трките од Red Bull Air Race шампионатот во 2014 и 2015 година. За американските пилоти и фанови, ова е прва шанса да стигнат до титулата по првите две титули на Мајк Манголд освоени во првите две години од организација на ова првенство, т.е по 11 години пауза.
Додека Гулијан влезе на голема врата во сезонското финале, Шонка и Хол имаа можност да ги средуваат спомените од трките коа беа втори и ја почуствуваа горчината на поразот отсликана во вицешампионска титула. Ова беше втора година по ред, шампионатот Red Bull Air Race се решаваше во последната битка од последната трка, и во двата случаи, пилотот под притисок (второпласиран) беше Шонка. Минатата трка, победата му се лизна низ прсти на чешкиот ас, па титулата заврши кај Јошихиде Муроја.
Овој пат, Гулијан му ја олесни работата, откако едвај ја помина првата рунда заради проблеми со моторот. Победниците од првата рунда во која 14 пилоти летаат во седум елиминациски дуели, заедно со најбрзиот меѓу поразените, ја сочинуваат листата на учесници за втората рунда, а во неа Гулијан се соочи со Шонка. Двете казни за Американецот му дадоа предност на неговиот чешки ривал, па потоа прашањето за титулата се решаваше во последната рунда меѓу Шонка и Хол, кои летаа во финалната четворка заедно со Чемблис и Бен Марфи од Велика Британија. Хал имаше време од 53,100 секунди, а потоа се случи „дежа ви“ во последниот лет на Шонка.
Со тежината на светскиот шампионат на своите рамења, чешкиот херој донесе совршен лет и ја грабна титулата со време од 52,796 секунди.
– Ова е сосема друга приказна отколку минатата сезона, и ова е моето најголемо спортско достигнување. За жал, единствено ми недостигаше Мајки (Гулијан) во финалната четворка, но сепак трката беше прекрасна и мислам дека сите, особено чешките навивачи, уживаа во неа,- се насмевна Шонка, кој успеа да направи неверојатно враќање во 2018, откако доби казни со дисквалификација на првите две трки од сезоната. – За последниот лет успеав да летам со чиста глава. Чув дека Мат (Хол) постигнал одлично време, и знаев дека треба да се потрудам повеќе и да немам казна или грешка, и успеав во тоа. Не можам да бидам посреќен!
Кога беа доделувани наградите за трката на „Тексас Мотор Спидвеј“, извиците за третопласираниот Чемблис, роден Тексашанец, беа исто толку гласни колку и за победникот Шонка и второпласираниот Хол. Потоа, кога беше доделуван трофејот за светски шампион, Шонка беше испрскан со шампањско од Хол и Гулијан, во најголемата прослава оваа сезона.
ТОП НОВОСТИ
