Да не се лажеме, тие од другата страна на „Големата бара“ воопшто не ги „есапат“ погонските единици со четири цилиндри. За нив ако не е најмалку шест цилиндри, тоа не е мотор, а ако е најмалку „шестак“ со поставеност на цилиндрите во V, тогаш капа му симнуваат.
Тоа беше пред околу 30 години, а како што велат, времињата се менуваат и оттаму доаѓа најбруталната изведба „в р икс“ во сопственост на Субару. Најзаслужни за сиот овој проект е Субару Моторспорт САД. Целосното име на автомобилот е „субару в р икс проџект миднајт“, а тоа „миднајт“ е поврзано со црната боја, додека „проџект“ најверојатно е поврзан со намалувањето на килограмите. Овој брутален „в р икс“ е полесен дури за 453 кг од серискиот „в р икс“, односно автомобилот тежи само 1.120 кг и сето тоа поради употребата на јаглеродни влакна немасто метал – школката целосно е изработена од јаглеродни влакна. Моторот има 2,0 литри зафатнина распоредена во четири цилиндри поставени во линија и со помош на турбо компресор од него се извадени преголеми 670 КС при 9.500 врт/мин и максимален вртежен момент од „мошне скромни“ 922 Нм. Зад сиот овој проект не стои само Субару Моторспорт САД, туку и возачот Скот Спид кој со Субару го има освоено првенството во класата Нитро Реликрос Тимс во 2021 год. Тој возач има голем удел во работата при создавањето на „субару в р икс проџект миднајт“. Многу спојлери, многу турбо коњски сили, мала тежина, 18 инчни тркала од марката ОЗ рејсинг и пневматици „јокохама адван“ со димензии 280/65 р 18.
Посетителите на годинашниов Фестивал на брзината во Гудвуд имаа прилика одблизу да се запознаат со ова врвно возило и да ги видат неговите брзински способности додека Скот Спид управуваше со него.
Засега еден примерок, а дали ќе има уште некој сѐ уште нема никакви најави. Можеби проектот е само експеримент со кој сакаат да докажат колку високо може да бидат поставени границите. Би било убаво овој примерок од Субару да послужи како отскочна даска за идниот „в р икс“. Зошто да не, замислата е супер, само уште Субару да се согласи на сериско производство и успехот нема да изостане – секој ќе сака да вози таква ламја на четири тркала.
ТОП НОВОСТИ
