И ПОКРАЈ ТОА ШТО СЕ ПРОДАВААТ ИСКЛУЧИВО НА ИНТЕРНЕТ И ВО ГЛАВНИОТ ГРАД НА ВЕЛИКА БРИТАНИЈА ЛОНДОН, ПАРФИМЕРИСКИТЕ ПРОИЗВОДИ НА FLORIS ОД 1730-ТA ГО ПРИВЛЕКУВААТ ВНИМАНИЕТО НА ЖЕНИТЕ И МАЖИТЕ ОД ЦЕЛИОТ СВЕТ БЕЗ РАЗЛИКА НА ГЕНЕРАЦИЈАТА, КОИ ВНИМАВААТ НА СЕБЕ, НА ИМИЏОТ… МНОГУМИНА СО ГОДИНИ, ДЕЦЕНИИ СЕ ВЕРНИ НА ПАРФЕМИТЕ, НО И НА КОЗМЕТИЧКИТЕ СРЕДСТВА, ПОРАДИ КВАЛИТЕТОТ, НЕОБИЧНИТЕ КОМБИНАЦИИ НА ЕТЕРИЧНИ МАСЛА ОД РАСТЕНИЈА ШТО ВИРЕАТ НАСЕКАДЕ
Парфемите, кои луѓето ги ставаат на себе, обично ја одразуваат нивната физичка и душевна расположба. Но, со нив некогаш се обидуваат и да ја маскираат, со цел да ја сменат на подобро. Патем ги оживуваат сеќавањата, ја креваат довербата во себеси, особено кога се работи за привлечноста, т.е. допадливоста, вклучително и оптимизмот, а препознатливоста е загарантирана во случај да се служат со исти парфеми долго време. На пример, многумина лондончан(к)и со години се верни на Floris, парфимеријата на 89 Jermyn Street во главниот град на Велика Британија – Лондон SW1Y 6JH, чија 292-годишна традиција е доволна за да веруваат во квалитетот, вредноста поради необичните комбинации на етерични масла од растенија што виреат насекаде, низ целиот свет, вклучително и ексклузивноста, бидејќи продажбата е ограничена, со која се одликуваат нејзините парфеми, козметички средства.
Освен тоа, парфемите се класика, во буквална смисла. Не може да ги употребува секој, а причината е јасна: делуваат богато, не поради цената, туку заради намерата, целта, да го засилат изобилството на духовните блага, добрата и особините на жените и мажите со чест, карактер и пристојност, богатството на душата со кое пленат.
ЗАНАЕТОТ КАКО ЛИЧНА ОПРЕДЕЛБА НА ДЕВЕТ ГЕНЕРАЦИИ
Елеганцијата, т.е. отменоста, префинетоста, вкусот во облекувањето и парфемите како да постојат за да се надополнуваат меѓусебно. Знаат да ја истакнат и лежерноста кога е потребно, благодарејќи на поинаквите хемиски формули што, заедно со класичните, ги смислуваат мајсторите за парфеми во лабораторијата на Floris која, исто така, се наоѓа во лондонскиот резиденцијален дистрикт St. James’s каде што Juan Famenias Floris во 1730-та ја отворил парфимеријата во која се продавале парфеми, прибори за бричење и чешли. Му помагале сопругата Elizabeth и синот Robert. Имено, занаетот на првата генерација парфимериски мајстори е лична определба, исто како и на деветтата во која спаѓа и Edward Bodenham, сегашниот директор што во 2018-та влезе во составот на British Society of Perfumers, чие постоење е безмалку 60-годишно.
Во меѓувреме изработката на парфеми е толку надградена што важи за ненадминлива во некои работи, без оглед на големиот избор, конкуренцијата и слично. Исто така, е проширен и асортиманот – се произведуваат и продаваат и гелови за туширање, дезодоранси, кремови, лосиони, помади, мирисливи свеќи, спрејови за простории, сапуни, средства за бричење и по него, вклучително и прибори (четки, бричеви), стикови, течности за плакнење уста итн. Сепак, парфемите се заштитен знак на Floris. Занимлив податок е и фактот што парфимеријата е реновирана дури во 2017-та, по пауза од еден век, но задржани се шпанските витрини од 1852-та, купени на Големата изложба во Хајдпарк, а одзади е и музејската збирка.
ЧЕРЧИЛ, ФЛЕМИНГ, МОНРО И КРАЛИЦАТА ЕЛИЗАБЕТА II МЕЃУ ПОСТОЈАНИТЕ КУПУВАЧИ
Порано со нејзините парфеми се намирисувале и Винстон Черчил (во музејот е изложена фактурата од 1934-та за Special N° 127 Eau de Toilette и есенцијата за капење Stephanotis, а се продаваат и денес по цена од 80, односно 55 фунти), и Јан Флеминг (измислувачот на фантастичните приказни за Џејмс Бонд често купувал во Floris, омилен му бил N° 89 Eau de Toilette, кој го споменува и во Moonraker, новелата од 1955-та), и Мерилин Монро (за неа, во 1950-те, бил направен парфемот Rose Geranium што го промовирала во САД), и кралицата Елизабета II (нејзиниот дијамантски јубилеј во 2013-та беше одбележан со лансирање на Royal Arms – Diamond Edition, кога се направија само шест примероци во антички кристални шишенца од 1914-та, едно за неа).
Всушност, секој парфем има своја приказна, како на пр. Neroli Voyage Eau de Parfum (морски, цитрусен), инспириран од писмото кое Robert, синот на Juan Famenias Floris, го испратил на родителите од едно патување. Писмото е интересно поради вкрстеното пишување, карактеристично за 18 и 19 век, а причина за тоа биле високите цени на хартијата и поштарината. Денес е доста баран, а 100 мл чинат 120 фунти.
Интересот за Spiced Bergamot е, исто така, голем и претставува своевидна интерпретација на оригиналниот Malmaison од почетокот на 19 век. 100-милилитарскиот парфем чини 200 фунти, како и Golden Amber, чиј извор на вдахновение има поврзаност со Италија, поточно езерото Гарда и деновите поминати таму. Обата се дел од лимитирани едиции, во друштво со цитрусните Jermyn Street (еден од најбараните, инспириран од четинарите на улицата каде што се наоѓа парфимеријата и мирисот на чистиот памук од работилниците во кои се шиеле кошули, на иконичната локација Henry Jermyn во 1664-та), Bergamotto Di Positano, Limes, Cefiro, JF (збогатен со дрвенести ноти). Но, доаѓањето на есента изискува парфеми како Leather Oud и Honey Oud (ориентални, по цена од 160 фунти), па 71/72 (ароматичниот дрвенест парфем чини 140 фунти), потоа Vert Fougère, N° 89, Santal, Elite, чии цени за 100 мл се движат од 80 до 120 фунти. Најнов е N° 007, комбинација на амбер и цитруси, инспириран од тајниот агент. Неговата цена е 200 фунти. Освен машки, има и женски верзии на повеќето од нив.
360.000 ДЕНАРИ ЗА СВОЈ ПАРФЕМ, АРХИВИРАН
Неодамна Floris воведе новина, изработка на парфеми чиј состав го смислуваат нарачателите. Откога ќе се пријават, во парфимеријата добиваат кутија за подарок, со празно шише од 100 милилитри, за да ја понесат на состанокот со мајсторот или мајсторицата за парфеми во задниот дел од продавницата и со шампањ се дружат околу два часа со него/неа, избирајќи ги базичните ноти. Потоа се мешаат и парфемот е готов. Таквото задоволство чини 550 фунти, но често се нарачуваат и две шишиња за брачни, љубовни парови. Цената е 950 фунти. Има можност и нарачателите комплетно да ги дизајнираат своите парфеми, кои се уникатни, неповторливи. Со тимот треба да се сретнат вкупно три пати – консултативно, а изработката трае отприлика шест месеци. Тоа е привилегија само на богатите затоа што чини 5.000 фунти (околу 360.000 денари). Притоа се добиваат шест 100-милилитарски персонализирани шишиња. Хемиските формули се архивираат за нарачателите или нивните потомци да можат да ги направат повторно. И тоа се наплатува 180 фунти.
Како и да е, лондончан(к)ите во Floris купуваат и подароци за блиските од причина што се повеќе од сигурни дека нема да згрешат во изборот. Нејзини муштерии се и мажите и жените од странство, кои често нарачуваат и онлајн.
ТОП НОВОСТИ
