„ФАТЕТЕ“ ЈА ВЕСЕЛАТА СТРАНА НА ПАТУВАЊЕТО И ВНИМАТЕЛНО, ПОДГОТВЕНИ И БЕЗ БРЗАЊЕ ТРГНЕТЕ НА ПАТУВАЊЕ ЗА ДА ГО МИНЕТЕ ОДМОРОТ СПОКОЈНО
Дали правилото е пишано или не, лето е и темата е веќе позната одење на одмор. За оние што ќе одлучат на одмор да патуваат со автомобил подготвивме неколку совети што ќе им бидат од корист. Прво, препорачливо е темелно да се исчисти автомобилот и од него да се извадат сите непотребни предмети, особено од багажникот со што ќе се добие повеќе простор и ќе се намали вкупната тежина на возилото.
При чистењето треба да се посвети посебно внимание на ветробранските стакла. Тие секогаш треба да бидат беспрекорно чисти. Второ на списокот е проверката на предната и на задната светлосна групација. Предните фарови мора да бидат правилно нагодени и снопот светлина да паѓа на асфалтот под правилен агол, а не да им удира во очи на возачите од спротива или нагоре.
Трето, проверка на сите течности во автомобилот, почнувајќи од маслото во моторот, течноста во сопирачкиот систем, маслото во менувачот и проверка на нивото на течноста потребна за миење на ветробранското стакло.
Потоа на ред доаѓа проверката на погонската едница. Во сервис компјутерски ќе проверат дали моторот работи како што треба. Петтата проверка е за пневматиците, дали и колку се прописно напумпани, а потоа секое тркало се контролира на машина за балансирање. Пожелно е пневматиците да бидат во одлична состојба, но доколку не се ќе треба да се заменат исклучително со нови, никако со половни.
Под точка шест е проверката на предниот дел заедно со системот за управување и негово центрирање. Добро балансираните пневматици со центрирањето на системот за управување е гаранција за безбедно возење.
Седма точка се сопирачките. Целиот систем мора да работи беспрекорно и сите делови мора да бидат нови и од соодветен производител. Откако ќе се направат сите наведени проверки, подготвени сте да возите, но само ако сте добро одморени и наспани. Внимавајте, тргнувањето премногу рано наутро носи голем ризик. Задремувањето најчесто се јавува пред изгрејсонце и во првиот час по изгревањето. Поради поспаност може да се предизвика сообраќајна незгода. Внимателно, подготвени и без брзање тргнете на патување за да го минете одморот спокојно.
За крај, без пиење алкохол и газирани пијалаци. Вода со лимон е одлична напивка додека возите зашто помага при високи температури и жед.
ТОП НОВОСТИ
