Малку е чудно, но како што сега се одвиваат нештата во светот, слободно можеме да кажеме дека ова е време на луксузните автомобили. Никогаш досега откако постои автомобилската индустрија не се продавале толку многу луксузни автомобили како денес. Ова е време на луксузот, на раскошот, време кое автомобилската индустрија ќе го памети се додека постои, а и потоа. Секој производител што досега имал каков било „корен“ со некој посебен поранешен модел, денес тој ист производител претставил обновена изведба. Таков е случајот на пример со Рено и неговата спортска дивизија Алпин, а ништо поинакви не се ни БМВ со Алпина, Фиат со Абарт итн. Има марки кои некогаш добро работеле, но згаснале, а денес повторно се враќаат и тоа на голема врата со многу скапи модели, како на пример Савчик. Има и такви кои за првпат се појавуваат и веднаш „удираат“ на највисокиот луксуз каде цените неретко се милионски. На пример се појави Римац со електричното купе „невера“ со цена од три милиони евра.
Деновиве Савчик се врати со моделот „300 гтц“. Во ’20 и ’30 год. од минатиот век Савчик многу успешно доработуваше модели од повеќе марки. Компанијата користела шасии од сериски автомобили и од нив правела свои изведби, а потоа продавани со повисока цена.
Некогаш француска компанија основана од рускиот емигрант Јаков Савчик, а денес холандска компанија (ре)основана во 2016 год. Веќе го спомнавме моделот „300 гтц“ кој е направен на основа од легендарниот „мерцедес 300 сл“ и од него ќе бидат направени само 15 примероци во кабриолет изведба. Цената на „савчик 300 гтц“ не е спомната, но се шпекулира со неколку стотици илјади долари. Материјалите се посебна приказна, исто како и рачната изработката, а дизајнот е вечната класика од ’60 год. од минатиот век.
Каросериски автомобилот е целосно изработен од јаглеродни влакна, со исклучок на шасијата која е директно позајмена од „мерцедес 300 сл“. Погонскиот агрегат е бензински и најверојатно ќе биде позајмен од спортскиот оддел на Марцедес наречен АМГ – V8 со двојно турбо и многу коњски сили. Ќе видиме до каде ќе стаса новообновената работилница Савчик и кој ќе биде нејзиниот втор модел.
ТОП НОВОСТИ
