ГОДИНАВА ВО ПАРИЗ СЕ ОРГАНИЗИРААТ ГОЛЕМ БРОЈ НАСТАНИ. ПРВО РОЛАНД ГАРОС, ЕДЕН ОД ЧЕТИРИТЕ НАЈПРЕСТИЖНИ ТЕНИСКИ ТУРНИРИ ВО СВЕТОТ, ПОТОА ОЛИМПИСКИТЕ ИГРИ,НАЈГОЛЕМАТА СПОРТСКА СРЕДБА НА ПЛАНЕТАВА, А ВО ОКТОМВРИ САЛОНОТ ЗА АВТОМОБИЛИ
Веќе неколку години саемските манифестации за автомобилите имаат проблеми, а некои воопшто и не се одржаа. Организаторите низ светот правеа сѐ што можат за да ја заинтересираат јавноста и наедно праќаа порака до производителите да ги изложат своите производи. Но резултати беа многу скромни.
Се добива впечаток дека класичните автомобилски саеми направиле некаква грешка, а производителите ги казнуваат со откажувања. За потсетување, во Женева беа присутни само осум марки автомобили, што е повеќе од поразително за манифестација од највисока светска класа. „Мондијал де л’ауто“ првпат е организиран пред 124 години, годинава слави јубилеј, односно изложбата ќе се одржи по 90 пат. До неодамна една година се одржуваше во Париз, а следната во Франкфурт.
Но бидејќи интересот за овој тип саеми речиси згасна, организаторите на ИАА решија секоја година да се одржува во друг град. Неколку години ИАА се одржува во Минхен, а така ќе биде и во 2025 година. Но очигледно нешто се случува во Париз во пресрет на 90. изложба. Производителите почнаа да се пријавуваат.
Домашната автомобилска индустрија ќе биде целосно застапена, а се пријавија и некои марки од соседството, како БМВ со Мини и ВАГ, односно Фолксваген, Ауди и Шкода. Иако некои германски марки најавија дека нема да се појават, сепак е можно да се премислат. Од исток доаѓа Киа, Тојота сѐ уште размислува, а другите не се изјаснуваат. Едната страна од групацијата Стелантис ќе учествува (Пежо, Цитроен и ДС), но Фиат, Алфа Ромео и Ланча тактизираат.
Зошто кинеската автомобилска индустрија, на пример, големите производители: БЈД, Чери, Грејт Вол, МГ, Гили го откажаа присуство? Дали станува збор за бојкот бидејќи европскиот пазар почна да воведува посебни давачки за кинеските автомобили? Ќе видиме што ќе се случува на другите саеми од големата петорка, Женева, Детроит, Пекинг / Шангај, Париз / Франкфурт и Токио.