ИСТОВРЕМЕНО НЕКОИ ГИ ОДЛОЖУВААТ САЕМСКИТЕ МАНИФЕСТАЦИИ, ДРУГИ ГИ ОТКАЖУВААТ, А ТРЕТИТЕ НЕМААТ НИКАКОВ ПРОБЛЕМ И ЗАБРЗАНО СЕ ПОДГОТВУВААТ ЗА ОТВОРАЊЕТО. НЕШТО СЕ СЛУЧУВА НА ПЛАНЕТАВА – ПЕКИНГ ЈА ОТКАЖА ИЗЛОЖБАТА, НО ЗАТОА ТАА ВО ЧИКАГО МИНА ВО НАЈДОБАР РЕД, А СЕГА НА РЕД Е ЊУЈОРК ДА ГИ ОТВОРИ ВРАТИТЕ ЗА АВТОМОБИЛИТЕ
Чудни нешта се случуваат во автомобилската индустрија, поточно во изложбите каде главната улога ја имаат „чудата на четири тркала“. Сега сме во очекување на една од петте најголеми автомобилски манифестации во светот, но деновиве организаторот ја откажа изложбата. Таа средба на автомобилите требаше да се одржи од 21 до 30 април во Пекинг. Ова е второ откажување од големата петорка. Најнапред беше откажана изложбата во Женева која секоја година се одржува во првата половина од месец март, а сега и Пекинг дојде на ред. Пекинг се одржува биенално, односно се менуваат со Шангај. Догодина би требало организацијата да биде во Шангај, но да видиме до каде ќе одат нештата во светот, а потоа да правиме распоред.
Во денешно време сè е можно, како на пример Пекинг догодина да го организира саемот, а Шангај да почека. Следна изложба од петте најголеми е таа во Детроит. Тамошниот организатор требаше на среде лето да ја отвори изложбата, но ја презакажа за крајoт од летото, односно за септември. Којзнае што може дотогаш да се случи. По оваа изложба на ред е Париз во октомври и за оваа година толку. Колку за потсетување и Салонот за автомобили во Париз се одржува еднаш во две години, поточно Париз се менува со Франкфурт. Петтата и последна изложба во календарот, која требаше да се одржи во Токио, не е воопшто внесена во распоредот на ОИКА.
Таа манифестација се одржува еднаш во две години, со тоа што се менува со „чудата на четири тркала“ од отсекот стопански возила која, исто така, се одржува во главниот град во Земјата на изгрејсонцето.
Сепак нешто чудно се случува. Саемот во Пекинг е откажан, но затоа организаторот на манифестацијата во Њујорк ги прави завршните подготовки за отворањето на 15 овој месец.
Всушност Салонот за автомобили во Њујорк ќе биде отворен на 13 и 14 април (среда) бидејќи тоа се денови наменети за новинарите. Изложбата ќе биде затворена во вечерните часови на 24 истиот месец. За првпат автомобилската манифестација во Њујорк била отворена во 1900 година. Како што официјално е најавено ќе учествуваат 37 производители на автомобили и над 100 други компании кои се во тесна врска со автомобилите.
И додека едни ги затвораат вратите за посетителите и изложувачите, други на големо очекуваат повеќе од милион посетители во „големото јаболко“. Погодивте, причина за откажувањето на изложбите е вирусот кој повеќе од две години прави хаос по светов.
И за крај една вест, Салонот за автомобили во Чикаго мина без никакви проблеми. Сè се одвиваше според планот, 9 и 10 февруари беа денови за новинари, а за посетителите беше отворен од 11 до 20. Фотографиите се од годинашнава изложба во Чикаго.
ТОП НОВОСТИ
