ДЕТРОИТ, КАКО И МНОГУТЕ САЕМСКИ МАНИФЕСТАЦИИ ПРЕД НЕГО, НАСТРАДА ОД НЕУЧЕСТВО НА ПОЕДИНИ ПРОИЗВОДИТЕЛИ. ИМА НЕКАКВА КРИЗА, НО АКО ГЕНЕРАЛНО СЕ ПОГЛЕДНАТ СВЕТСКИТЕ ПРЕМИЕРИ, ЛУКСУЗОТ ВООПШТО НЕ Е ИЗОСТАВЕН, НАПРОТИВ, ГО ИМА НА ПРЕТЕК.
Како и сите самски манифестации за автомобили така и оваа во Детроит на почетокот од годинава е погоден од неучество на неколку производители, односно не се неколку. Откако автомобилската индустрија доживеа тешка криза, така велат производителите, еден по еден почнаа се почесто и почесто да ги откажуваат учествата на големите саемски манифестации, а една од нив е секако и оваа во Детроит која се одржа од 17 до 27 јануари (на 15 и 16 истиот месец новинарските денови). Некои производители ја избегнуваат големата светска саемска петорка и одат на помалите, како што направи Мерцедес во Ла Вегас на ЦЕС со моделот „цла“ дизајниран од Славче Таневски, Македонец кој работи во дизајнерскиот оддел на Мерцедес.
Да напомнеме дека ова е последен пат Салонот за автомобили во Детроит да се одржува на почетокот од годината. Следниот во 2020 нема да биде среде зима, туку среде лето. Зошто и како, тоа си знаат само организаторите. Сепак според логиката на посетителите, во летниот период е далеку позабавно да се патува и да се посетуваат манифестации од светски ков, отколку истата да биде посетена кога надворешните температури се под нулата.
Организаторот догодина очекува рекордна посетеност, но оди и на севкупна реорганизација за да бидат привлечени поголем број изложувачи и да оствари поголем профит. ГМ и Форд, исто така, прават многу структурални измени, а најголемата е помеѓу Форд и Фолксваген – во иднина ќе настапуваат заеднички со комерцијалните возила.
„Шелби мустанг кобра гт 500“ беше претставување над претставувањата кое домашната публика го очекуваше со нетрпение. Ова супер купе за тамошните значи повеќе од икона – V85,2 литри со над 700 КС. Форд мораше да направи потег повеќе затоа што Доџ моторите во неговите „пеколни мачки“ ги навитка до импресивни 707 КС. Покрај овој потрес од премиера, имаше уште еден кој дојде од Далечниот Исток. Можеме да го наречеми цунами или катана, затоа што зборуваме за Тојотиниот модел „супра“ кој го фати „дремка“ цели 17 години. Љубителите на овој модел беа воодушевени кога јапонскиот производител го најави враќањето на „супрата“ во семејството. Малку чудно, но вистинито, на саемот главни беа спортските автомобили како тој од Лексус, моделот „рц ф трак едишн“. Едно му беше малку и си претстави уште едно купе, овој пат во отворено издание, „лц конвертибл концепт“. Велат концепт, ама ова веќе е сериски автомобил, од едноставна причина што кај него нема ни „к“ од концепт. Кашата да биде повкусна дополнително ја зачини Нисан со купе концептот на електричен погон, „ИМс“. Да не остане Инфинити покусо, нели и тој е од тие од Далечниот Исток, претстави концепт сув возилото „ку икс инспирејшн“, а покрај него и супер купето во баркета болид издание „прототип 10“ – визија на Инфинити за сериски автомобили на електричен погон во блиска иднина.
Јапонската индустрија претстави уште еден спортист, „субару сти с 209“ наменет за северноамериканскиот пазар со 341 КС и 2,5 литарски боксер мотор. Ете, повторно суров спортски автомобил кој се купува со многу пари. Ова се нарекува луксуз, така? Тоа што предизвика голем интерес кај посетителите е луксуз и тоа спортскиот, а производителите се жалат дека нема доволен број купувачи.
Домашните производители покрај Форд и неговиот „шелби мустанг“, го претставија РАМ со неговиот „хеви дјути 2500“, кој неодмна се закити со титулата „Пик ап на годината во Северна Америка“. Покрај РАМ-от, групацијата Фиат Крајслер во името на прочуената марка Доџ го претстави „челинџерот, уште еден примерок на спортско купе со поголема количина коњски сили.
Новодојдената Махиндра претстави теренско возило „роксор“ кое многу наликува на Крајсперовиот „џип вранглер“ бојадисан во боите на Индија. Еден од поголемите производители на возила како да останал без идеја што понатаму, односно не сакал да најми дизајнерска куќа која ќе му ги реши слатките маки. И сега погодувате компанијата „ФЦА“ протестира поради овој непромислен потег на индијската компанија. Дека нештата можат да се направат како што треба доказ е „махиндра марацо“. Прсти има замешано Пининфарина и таа нота веднаш е приметлива. Повикуваш некој што си го знае занаетот и нема главоболки. За едното возило одговорен е Пининфарина, а „роксор“ го оставиле сам и направиле тоа што не треба. Тие си знаат како треба, „големи“ се.
КИА претстави теренско возило, односно сув по мерка на тамошните жители и пазар, „телјурид“, заедно со тркачката изведби од моделот „стингер“. Поголемиот брат Хјундаи се претстави со луксузната марка Генезис и моделот „г70“ и моделот кој ќе биде дел од ВТЦЦ, „и 30 аутоспорт“.
Кадилак една од луксузните американски марки претстави голем сув „икс т 6“, но и друг со електричен погон наречен од конструкторите „бев 3“. Тоа ќе биде првиот електричен кросовер од Кадилак од кој подоцна ќе бидат развиени неколку изведби чии погони ќе бидат на прдната или задната оска, но и на сите четири.
„ГАЦ“ или „Гвангжу Аутомотив Компани“, доаѓа од Кина. Производителот сè уште не продава возила на северноамериканскиот пазар, но велат дека подготовките се при крај. Ова што изложуваат во Детроит е само реклама и претставување пред публиката и потенцијалните купувачи. Концептот „ентранз ев“ треба да ги задоволи вкусовите на сите кои мислат да купуваат сув, односно кросовер чиј дизајн е радикален во однос на конкуренцијата, а тоа е добро за нештата да станат поубави. Дали и серискиот електричен кросовер ќе ја има истата линија како и концептот, останува да видиме.
Фолксваген, годинава, беше присутен со новите лица на моделите „пасат“ и „џета“, како едни од ретките производители од континентов. Алфа Ромео беше во Детроит со нејзиниот болид со кој се натпреварува во светскиот шампионат во формула 1.
Да ја затвориме „сесијата“ од Детроит каде некогаш бараа простор повеќе за изложување, а сега го имаше на претек. Да откажат учество Ауди, БМВ, Волво, Јагуар, Ленд Ровер, Мерцедес, Мини, Митсубиши, Порше, тоа е еднакво на некој вид дебакл. Ако некој треба да учествува на Салонот за автомобили во Детроит, тогаш тоа треба да биде целата светска индустрија затоа што тој пазар има голема куповна моќ, а воедно побарувачката на нови автомобили е толку разноврсна што ретко кој друг пазар може да се пофали дека буквално му се потребни возила речиси од секаква каросериска изведба и да не заборавиме, таму се бара од наједноставното и најевтиното до најлуксузното и најскапото.
ТОП НОВОСТИ
