Не му веруваа кога го претстави првиот концепт „ц 1“, истото се случи и при претставувањето на вториот концепт „ц 2“, но кога го претстави својот прв сериски автомобил наречен „невера“, е тогаш му поверуваа и воедно му љубомореа. Како тоа можеше да се случи, сосема мала екипа да направи врвен спортски автомобил?
Малку беше тоа што таа екипа направи хипер купе автомобил, а сега истиот е и најбрзиот на планетава со електричен погон. Конкуренцијата го следи секој чекор на Мате Римац и неговата „невера“, автомобил со скоро 2.000 КС. Кога го претстави својот втор концепт, Римац ја навести максималната брзина од 412 км/ч. Не му веруваа, мислеа дека човекот фантазира, но фантазиите се остварија. „Римац невера“ постигна максимална брзина од 412 км/ч и со тоа ова купе официјално е најбрзото на планетава во класата на возила со чисто електричен погон.
Рекордот е постигнат во Германија на овална патека со два правци од по точно 4,0 км. Остана конкуренцијата со прстот во уста и сѐ уште се прашуваат каде погрешиле. Големиве имаат оддели со десетици и десетици вработени, со конструктори кои зад себе имаат многу што да кажат, но ниту еден тим од тие не успеа да биде подобар од Мате Римац. Хрватскиот генијалец ги надмина сите и сега е носител на светски рекорд и од неодамна е сопственик на Бугати. Кој е следниот чекор на Мате Римац, прашање кое конкуренцијата везден си го поставува, а одговор нема.
„Римац невера“ поседува 1.914 КС и погон на сите тркала. Секое тркало има независен електро магнетен мотор. Забрзување од 0 до 100 км/ч за 1,85 сек. Цена, 2,0 милиони евра.
ТОП НОВОСТИ
