Како што тргнале работите во автомобилската индустрија, еден од производителите кој засега итро постапува е Рено. Светот како да страда од неинвентивност, а тоа негативно се одразува во индустријата на четири тркала. Пливајќи во тие немирни води, Рено одбра насока во која ги повика старите добри и многу успешни модели повторно да се појават во освежен облик, но никако радикален. Од сите тие модели можеби популарната „четворка“ е отидена најдалеку со дизајнот, но затоа „твинго“ и легендарната „петка“ го водат орото во сличноста со, да ги наречеме, оригиналните модели. Се чини овој потег на Рено многу добро ќе се одрази во продажбата на спомнатите модели. Надалеку прочуена „петка турбо“ имаше свое првично претставување во 1980 год. Ај што умот на купувачите им го свртеа со „рено 5 гт турбо“, но потоа како капак на сѐ беше „рено 5 турбо“ (160 КС и од 0 до 100 км/ч за 6,9 сек), изведба со уште закоравени спортски особини.
Така беше некогаш, а денес „петката“ повторно е во игра и повторно изведбата „турбо“, но овој пат со електричен погон – два електромотори чија силина од 540 коњи се пренесува на задна оска. Како резултат на таа силина забрзувањето од 0 до 100 км/ч изнесува 3,5 сек.
Оваа направа со презиме „5 турбо 3 е“ тежи 1.450 кг, а нејзините димензии се: должина 4,08 м, ширина 2,03 м, висина 1,38 м и 2,57 м растојание меѓу оските. Со едно полнење на 70 кВч батерија, автомобилот изминува малку над 400 км. Полнењето на батеријата е солидно, од 15 до 80 отсто за 15 мин.
Ќе бидат произведени само 1.980 примероци, бројка која ја означува годината кога е претставен првичниот, тој вистинскиот „рено 5 турбо“, а овој денес е негов наследник, потомок. Засега производителот не се изјаснил за цената.
ТОП НОВОСТИ
