Нема што да објаснуваме за и околу супер луксузните автомобили, тие во повеќе од две децении „одат како алва“, а во моментов се појавуваат сосема нови производители, нудејќи ги своите првенци. Сето тоа е во ред, но тие новајлии во кругот на супер луксузните купе автомобили немаат минато, како што има еден Ферари, Бентли, Масерати и останатите.
Најновото од овој свет на четири тркала е „ред бул рб 17“. Ред бул најнапред се појави како некој вид енергетски пијалак, потоа почна да влегува како спонзор во многу спортови и така дотурка и до формула 1. Таму е околу три децении и сега за првпат прави некој вид гран туризмо купе, но засега не е за регистрирање и секојдневно возење, туку само за на тркачка патека. Дали подоцна Ред Бул ќе направи и туристичка изведба, ќе треба да почекаме.
V8 мотор со двојна турбина, можеби ќе биде со умерена хибридна технологија и вкупна силина од скоро 1.200 КС. Така велат конструкторите кои сѐ уште не кажуваат кој ќе го прави моторот. Лејтон Хаус, Косворт или некој сосема друг или можеби Форд – Ред Бул сега се договара со Форд за заеднички настап во шампионатот од формула 1.
„Ред бул рб 17“ е правен на основа од болидот од формула 1, а конструкторите велат ќе биде најостриот досега направен купе автомобил, најостар во смисла многу близок до возните својства на ф1 болидот „ред бул“. Ќе бидат произведени само 50 примероци, а цената на еден ќе биде 6,2 мил. долари. Зад конструкцијата стои името на Адријан Њуи, добро познато име од светот на формула 1. Првичното претставување го имаше во Гудвуд на собирот наречен Фестивал на брзината. Кога првиот примерок ќе стаса до еден од тие 50 сопственици? Тоа биде договор меѓу купувачот и производителот, а сѐ останато оди „под тезга“, односно нарачка.
ТОП НОВОСТИ
