LAND ROVER НА СВЕТОТ МУ ГО ПРЕТСТАВИ НОВИОТ RANGE ROVER, ПЕТТАТА ГЕНЕРАЦИЈА НА СВОЈОТ ВОДЕЧКИ ЛУКСУЗЕН SUV МОДЕЛ. ЕЛЕГАНТНИОТ НОВ RANGE ROVER Е, КАКО ШТО СЕ ГЛЕДА, ДЕФИНИЦИЈА ЗА СОВРЕМЕН ЛУКСУЗ, ОБЕЗБЕДУВАЈЌИ ПОГОЛЕМА СОФИСТИЦИРАНОСТ, ПОГОЛЕМ ИЗБОР ЗА КЛИЕНТИТЕ И ПОВЕЌЕ ОПЦИИ ЗА ИНДИВИДУАЛИЗАЦИЈА ОД КОГА БИЛО ДОСЕГА
Повод за овој текст е претставувањето на најновата петта генерација од теренскиот луксуз на тркала именуван како „ренџ ровер“. Но, не е во прашање луксузот затоа што е однапред познато какви возила претставува Ренџ Ровер. Единствената разлика со претходните четири генерации се техничко технолошките решенија заедно со електрониката. Деловите од дрво и од полублагородни метали, врвните кожени материјали и на нив сличните се присутни со децении наназад. Можеби дизајнот е сменет, но традиционалната рачна изработка и доработка е иста како пред пет децении.
Ако некој во класата на големи теренски возила го вовел луксузот, тогаш тоа е производителот Ленд Ровер во моделот „ренџ ровер“. Дали возилото ќе го именувате како марка или модел, нема да погрешите, бидејќи и едното и другото е точно. Низ десетлетијата моделот Ренџ Ровер како да излегол од таа „шема“ и сега е луксузна марка на Ленд Роверот, а неговото име најправилно е „ленд ровер ренџ ровер“.
Веднаш да го нагласиме следново во врска со дизајнот. Иако денес сите производителите заедно со дизајнерите „трчаат“ по релјефни облици, Ренџ Ровер го први сосема спротивното. Тие релјефни облици најчесто се светлата, речиси сите се испакнати надвор од линијата на каросеријата, а не се далеку ни одбојниците и некои други помали делови на денешните најнови модели. Кај „ренџ ровер“ нема ниту еден релјефен облик, сè е во линија со каросеријата, ништо не „штрчи“, како да е скулптура извајана од ветрот и водата. Поклоник на ваквиот дизајн беше и Исузу, а како типичен претставник и единица мерка на „скулптура дизајнот“ ќе го спомнеме неговиот концепт „г б икс“ од 2001 година.
Теренските возила денес ги нарекуваат „сув“ (сув = возила за забава) затоа што не се исклучиво теренски, но затоа се способни да совладаат сурови терени надвор од асфалтот. Новава генерација, петта по ред, располага со 5.052 мм во должина, додека изведбата со подолгото меѓуоскино растојание („лвб“) има дополнителни 200 мм или вкупно 5.252 мм. Во таа должина конструкторите сместиле четири, пет, односно седум седишта и сега на вас е да одлучите која луксузна изведба ќе ја одберете. „Ренџ ровер“ нема основна изведба. Од оваа може да има уште полуксузна, но за таквите изведби одговорните од Ренџ Ровер навреме ќе известат. Таквите изведби најчесто се прават во директно присуство на идниот сопственик и опремата што ќе биде одбрана се разбира, има посебна цена.
Простор на претек, врвна удобност и неизбежните безбедносно електронски помагала го прават возењето вистинско уживање. И за да бидат во чекор со времето и условите кои владеат во светот, конструкторите се погрижиле сè да е под контрола – системот за проветрување на возилото ги штити патниците од алергените, бактериите и вирусите вклучувајќи го и сегашниов надалеку познатиот „сарс ков – 2“. Затоа нема место за паника и за прашања од типот колку воздушни перничиња има или дали има странични воздушни завеси. „Ренџ ровер“ е возило од висока класа и тука нема компромиси. Колку за потсетување, оваа класа од возила не спаѓа во премиум класата, туку над неа. Затоа тука може само да искоментирате дека некоја од боите во внатрешноста не оди со деталите на праговите или бојата на тонираните стакла не е соодветна со внатрешниот декор и слично.
Класиката од луксуз има и класика од погонски агрегат кој најмногу ѝ доликува, а тоа е бензинскиот 4,4 литарскиот V8. Со овој мотор возилото постигнува неверојатно забрзување од 0 до 100 км/ч за само 4,6 секунди, иако возилото е тешко над 2,5 тони, додека сите останати погонски единици имаат помала силина од овој позајмениов од БМВ. Покрај најснажниот, палетата од бензинци ја дополнуваат: „п 360“ и „п 400“ со умерена хибридна технологија, додека „п 440“ и „п 510“ го комплетираат списокот со „плаг ин хибридната технологија“. Овие изведби можат да изминат околу 100 км користејќи ја електричната енергија како погонска.
И дизел агрегатите се присутни во моделите: „д 250“ „д 300“ и „д 350“ и поседуваат умерена хибридна технологија иста како во претходно спомнатите два бензински агрегати. Независно кој погонски агрегат го има возилото, подвозјето секогаш е контролирано од компјутер поврзан со навигацијата. Сите потребни информации за патот стигнуваат до компјутрот, а овој го подесува подвозјето според условите на патот, конфигурацијата на асфалтот и брзината на движење. Цената за „основниот модел“ изнесува околу 110.000 долари, а изведбата со V8 мотор ќе чини онолку колку што ќе каже производителот за време на официјалното саемско претставување пред светската јавност наредниот месец во Лос Анџелес, ако изложбата воопшто се одржи.
ТОП НОВОСТИ
