Рамазан Бајрам-ХУМАНОСТА, ЕДНА ОД БИТНИТЕ ОДЛИКИ НА ГОЛЕМИОТ ИСЛАМСКИ ПРАЗНИК

МУСЛИМАНСКИТЕ ВЕРНИЦИ ВО МАКЕДОНИЈА НА 30 МАРТ (НЕДЕЛА) ПОЧНУВААТ ДА ГО СЛАВАТ РАМАЗАН-БАЈРАМ, ПОРАДИ ШТО ВО ПОНЕДЕЛНИК (31 МАРТ) НЕ СЕ РАБОТИ. ПРАЗНУВАЊЕТО Е ТРИДНЕВНО, СЛЕДУВА ПО РАМАЗАНСКИОТ ПОСТ

Овој празник всушност го означува крајот на рамазанот деветтиот месец од исламскиот календар, месецот на строгиот пост кај муслиманите кога се јаде и пие само ноќе во определни часови, односно од зајдисонце до изгрејсонце. Годинава започна на 1 март, официјално вечерта на 28 февруари, по заоѓањето на сонцето кога, согласно исламскиот календар, почнува новиот ден. Завршува во сабота навечер, на 29 март.

Во текот на сите денови, припадниците на муслиманската вера се воздржуваат од јадење, пиење и сексуални односи, посветувајќи се на молитвата, размислувањето и заедништвото, солидарноста со другите. Рамазанскиот пост се смета за една од петте должности на секој муслиман. Останатите четири се шехадетот, намазот, зекатот и аџилакот (хаџ)  сите начела (основни поставки) се засноваат врз учењето на Коранот (Куранот). Почетокот и крајот на рамазанот секогаш се врзува со ист датум на исламскиот календар затоа што е лунарен, за разлика од јулијанскиот (сончев). Но, постои можност и датата да варира од една земја во друга, причината секако е видливоста на Месечината, т.е. дали може да се види. На 30 март, во недела почнува тридневното празнување.

Утрината муслиманските верници одат во џамија, на молитва. Потоа се упатуваат кон гробиштата, да ги посетат гробовите на своите предци, блиски роднини. Откако целата фамилија ќе се собере дома, почнува меѓусебното честитање на Бајрам. Обичајно е прво да им се честита на постарите, со бакнување рака. Доколку некои членови на семејството се во близина, одат и кај нив. Честитањето неретко се реализира и телефонски, на интернет…, ако живеат подалеку, а продолжува и во наредните денови. Скараните се помируваат. Секако, на празникот најмногу му се радуваат малите деца бидејќи добиваат многу подароци. Каде и да затропаат, на која било врата, им даваат слатки. Трпезата е богата, задолжително се пече месо, се суче бајрамска баклава…

Една од битните одлики на Рамазан-бајрам е човечноста, хуманоста. Солидарноста со оние што имаат проблеми, тешкотии во животот им е заедничка на сите, и тоа со морална, финансиска, материјална и друг вид поддршка. Целта на големиот исламски празник е всушност да им се помогне и на сиромашните и на осамените и на децата без родители, не само Бајрам да го прослават онака како што треба достоинствено, туку и засекогаш, доколку е можно, да им се најде спас.

Рамазан-бајрам се прославува во целиот свет, онаму каде што населението е муслиманско независно дали се работи за мнозинство или пак за малцинство. Честитките не изостануваат ниту од соседите, пријателите, колегите…, без оглед на нивната вера. Соживотот на поединците во голема мера влијае и на мирољубивата коегзистенција животот во државната заедница.

Бајрам шериф мубарек олсун.

Нека е благословен племенитиот Бајрам.

Игор Ландсберг