НАЈВИСОКАТА ТЕХНОЛОГИЈА НИ Е ПРЕД НОС, А НИЕ ЈА ЗАНЕМАРУВАМЕ. И НАМЕСТО ДА ГИ ОТСТРАНИ ЗАГАДУВАЧИТЕ, СВЕТОТ НАПРАВИ ФИЛТРИ ЗА ПРОЧИСТУВАЊЕ ВОЗДУХ. ЗОШТО?
Живееме во време и простор што воопшто не се соодветни за човекот и за животната средина. Планетава Земја, а со неа и нашава држава, се соочува со преголемо загадување од секаков вид: загадување на воздухот, водите, почвата, загадување од бучава, светлосно загадување итн. Скопје, Битола, Тетово, Гостивар и некои други градови веќе се наоѓаат на списокот на топ 10 града во светот со најзагаден воздух, што е повеќе од катастрофа. Светот, како и Македонија, тешко се справува со загадувањето. Загадениот воздух е причина за многу болести, а најмногу страдаат дишните патишта.
Каде се наоѓа високата технологија во овој „воздушен јазол“? Поради сè поголемото загадување на воздухот се појавија производители што прават уреди за прочистување на воздухот. Овие уреди најчесто се поставуваат во: домовите, работните простории, училниците, продавниците и на многу други места. Прочистувачите на воздух имаат вграден филтер што треба редовно да се чисти, а подоцна да се замени со нов. Каде се фрла отпадот од редовното чистење на филтрите, каде се фрлаат филтрите што се заменуваат со нови? И зошто се потребни прочистувачи на воздух кога проблемот со загадувањето може да се реши со едноставно отстранување на загадувачите. Светот развива „висока“ технологија за прочистување на воздухот, а не ги отстранува загадувачите.
На сето ова, како и секогаш, природата одговорила соодветно има еден куп растенија што го прочистуваат воздухот од најразновидни загадувачи. Тие растенија многу лесно може да се одгледуваат во домот. На пример, фикусот е едно од тие растенија. Да тргнеме по азбучен ред: Aglaonema, Aloe barbadensis miller, Chamaedorea seifrizii, Chlorophytum comosum, Dracaena, Dypsis lutescens, Epipremnum aureum, Ficus benjamina, Ficus elastica, Gerbera jamesonii, Hedera helix, Nephrolepis exaltata, Philodendron, Sansevieria trifasciata, Spathiphyllum и други. Имињата на растенијата се напишани со нивното латинско име за да можете да ги побарате во цвеќарниците. И покрај тоа што природата има совршен систем за справување со загадениот воздух, човекот не го забележува тоа и упорно развива технологија, односно филтри за прочистување на воздухот, но тие користат електрична енергија и создаваат бучава. Тоа значи дека загадуваат по три основи, загадување од бучава, загадување при чистење на филтерот и загадување при негово менување. Точно е дека овие вештачки филтри успеваат да го прочистат воздухот во една просторија многу подобро отколку природните филтри (растенијата), но вториве не создаваат отпад. А човекот се чувствува подобро кога во близина има дел од природата, цвет, зеленило. Денес повеќе компании произведуваат растенија по вештачки пат што го прочистуваат воздухот, а такво растение се продава за најмалку 100 евра. Тоа го прават со изменување на генетскиот материјал и со негово комбинирање со други растенија. Што е посовршено, вештачката технологија со филтрите или природата со растенијата? Препорака е во домот, работните простории да имате некои од споменатите растенија.
ТОП НОВОСТИ
