Претставуваме Zenvo TSR-S-ОЛИЦЕТВОРЕНИЕ НА ИНЖЕНЕРСКА БРИЛИЈАНТНОСТ

ZENVO TSR-S Е АВТОМОБИЛСКА РЕТКОСТ КОЈА СЕ ПОЈАВУВА ЕДНАШ ВО ГЕНЕРАЦИЈА И ОСТАНУВА ЗАПАМЕТЕН БЛАГОДАРЕНИЕ НА ВРВНАТА ТЕХНОЛОГИЈА КОЈА ПОСТАВУВА НОВИ ГРАНИЦИ ВО СВЕТОТ НА АВТОМОБИЛСКОТО ИНЖЕНЕРСТВО

Данскиот производител на автомобилска реткост Zenvo иако можеби не е толку извикан како останатите производители на хипер спортски автомобили, сепак тоа не го спречува да произведува технички брилијантни уметнички дела на четири тркала. Под нив се потпишува данскиот инженерски гуру Троелс Волертсен од кого и почнува приказната за Zenvo во 2004 година. После четири години развој на крајот на 2008 година се појавува првиот дански хипер-автомобил Zenvo ST1. Со 1104 КС под капак и 375 km/h крајна брзина ST1 се произведе во 15 примероци и беше вовед во успешната приказна на Zenvo. Низ седум години напорен развој во 2016 дојде и неговиот наследник TS1. Технички понапреден и со основа која дозволува понатамошен развој тој послужува како база за следните модели на Zenvo: неговата подобрена изведба TS1 GT, чистокрвниот тркач TSR и неговата патна верзија TSR-S.

Карактеристика за сите модели на Zenvo се навиениот V8 со двоен механички компресор, менувачот со хеликоидни запченици и специфичната плетка на панелите од јаглеродни влакна која се создава според желбите на клиентот правејќи секој модел да биде уникатен. Според овој терк доаѓа последното видување на Zenvo на тема хипер-автомобил моделот TSR-S со хибриден погон.

ЈАДРО НА ИНОВАЦИИ

Иако ја носи наставката S во ознаката TSR не е тркач, туку спортски автомобил наменет за на пат, дури и за секојдневно користење благодарение на својот хибриден погон и можностa за прилагодување на системите за управување со автомобилот. Добиен со комбинирање на одличната основа на TS1 GT и дивата тркачка природа на TSR и додавањето на врвните ново развиени технички достигнувања TSR-S буквално претставува јадро на иновации поставувајќи нови граници во светот на автомобилското инженерство.

Благодарение на примената на напредните аеродинамични решенија кои се среќаваат првпат кај еден автомобил, TSR-S нуди повеќе од три пати поголем „downforce” од TS1 GT. Најголем виновник за ова е патентот на активното задно крило наречено Zenvo Centripetal Wing. Името доаѓа од центрипетална сила која го присилува телото да следи крива патека на движење. Поставено на две ротациски оски кои му дозволуваат да го менува аголот крилото обезбедува поголема тракција во свијоци и помага при сопирање во улога на дополнителна воздушна сопирачка. Еве како функционира:

Додека фиксното крило е дизајнирано да создава негативен потисок при одредена брзина, активното крило на Zenvo го менува аголот и обезбедува максимален потисок без оглед на брзината. Воедно се поткрева на страната од автомобилот која во моментот се наоѓа на внатрешниот дел на свијокот. Така силата од струењето на воздухот дополнително го турка автомобилот во свијок подобрувајќи ја управливоста, а со зголемувањето на потисокот ја подобрува тракцијата на внатрешното задно тркало и не му дозволува на задникот да побегне. При сопирање, пак, целосно се исправува и делува како воздушна сопирачка. Затоа при возење се чини како некоја невидлива рака да го води TSR-S низ свијоци не дозволувајќи му да отстапи од зададената линија.

ХИБРИДЕН ПОГОН ЗА ТРКАЧКИ МОТОР

Моторот сместен централно во шасијата е дериват на тркачкиот мотор на TSR, но навиен да ослободува 75 КС повеќе при 1.400 min^-1 повисоко. Така 5.8 литарскиот V8 со помош на двојниот механички компресор остварува бесни 1194 КС при 8.500 min^-1 и вртежен момент од масивни 1.139 Nm кои кон задните тркала се испраќаат преку седум степен секвенцијален менувач со хеликоидни запченци по кои Zenvo стана препознатлив. Хеликоидните запченици стојат косо во однос на оската на запченикот, имаат поголема зафатна површина и дозволуваат поголеми оптоварувања. Електричниот мотор од хибридниот модул е споен директно со менувачот и покрај зголемувањето на моќноста ја рафинира контролата на тракција и обезбедува дополнителен преносен однос бидејќи се користи за возење во „рикверц”. Воедно менувачот има два модуси на работа: Road – за на пат каде степените се менуваат со помош на електроника, а сензорите го прилагодуваат менувањето за да се избегне бруталноста која се чувствува при директното менување. Race – за на патека кога бруталноста на директното механичко менување годи. Во оваа поставка менувачот на TSR-S е еден од најбрзите што постојат.

Техниката му овозможува на TSR-S да има две лица. Да биде најблиску што може до чистокрвен тркачки автомобил, а сепак да може да се вози секојдневно. За да може да се менува карактерот на TSR-S развиен е систем кој ги менува карактеристиките на автомобилот зависно од потребите на возачот. Во основа постојат три поставки со едноставни ознаки: Minimum, IQ и Maximum. Minimum ја ограничува моќноста на 710 КС, a Maximum го нуди целосниот потенцијал на 1.194 КС. Најинтересна е поставката IQ која сама ги прилагодува параметрите според условите на возење. Таа е најпогодна за да се ужива во задоволството да се вози тркачки автомобил на пат. Напредната контрола на тракција постојано надгледува каков е контактот на тркалата со подлогата и соодветно ја прилагодува моќноста.

КАРБОНСКА ПЛЕТКА СПОРЕД ИНДИВИДУАЛЕН ВКУС

Постојаниот развој на полето на карбонските технологии му овозможил на Zenvo да им понуди на клиентите геометриска плетка на јаглеродните влакна која ќе биде изработена по нивен вкус. Потоа уникатната плетка се поставува рачно од техничарите на Zenvo, а елементите изработени од овој материјал стануваат уникатни ремек дела давајќи му посебен печат на секој примерок на TSR-S. Такви се и бандажите изработени од овој материјал. Така наречените фрагментирани карбонски бандажи се 15 kg од адекватна алуминиумска варијанта. Секој фрагмент од бандажите се сече рачно и се поставува на одбраното место за да се создаде единствен дизајнерски мотив. За да се направи еден комплет потребна им е една седмица на двајца техничари. Како шлаг на оваа ексклузива доаѓа и можноста за вметнување на воден жиг во карбонските елементи според желбите на клиентот.

Секој детаљ од минималистички скроената кабина е одраз на ултимативната тркачка филозофија на Zenvo. Непотребната тежина е елиминирана. Во кабината нема аудио систем ниту звучници, нема сателитска навигација, клима уред, воздушни перници, а седиштата како спортски кади се местат механички. Секако оставен е простор за исполнување на желбите на клиентите. Сето ова може да се напика во кабината на TSR-S, a нема ограничување ниту за материјалите. Без оглед на сопствената филозофија, во Zenvo се свесни дека кога се во прашање желбите на клиентот не постојат граници. Во ентериерот може да се вметне дури и знамето на земјата од која доаѓа клиентот. Затоа и цената на TSR-S е соодветна и почнува од 1,45 милиони евра, а за да се сочува ексклузивноста производството како и за останатите модели е ограничено на само пет примероци годишно.

Љубомир Анастасовски