КОГА ГО НАБЉУДУВАТЕ ПОДВОДНИОТ ЖИВ СВЕТ, НИВНОТО ДВИЖЕЊЕ ВИ ИЗГЛЕДА ТОЛКУ ЕДНОСТАВНО И ЕЛЕГАНТНО. ИМАТЕ ТАКОВ ВПЕЧАТОК ЗАТОА ШТО ТОА Е НИВНАТА ПРИРОДНА СРЕДИНА, А АКО САКАТЕ ДА БИДЕТЕ ДЕЛ ОД НЕА БАРЕМ И НА НЕКОЛКУ МИНУТИ, ТОГАШ „АКВАЏЕТ Х 2“ Е ТОКМУ ЗА ВАС.
Зима е и ни на крај памет не ни е до пливање, плажи, сончање и сè друго што доаѓа со летото. Но, планетава стана глобално село и сега речиси сите нешта „му се достапни“ на човештвото. Затоа вашиот зимски одмор можете да го претворите во летен.
За тие денови на одмор да ви бидат уште повозбудливи се погрижиле од компанијата Ховерстар кои конструирале една играчка во вид на најсовремено летало. Има крила и труп (фуселаж) и мотор сместен во опашката. Ако играчката е направена во вид на летало, сепак не лета. Не лета во воздух, но затоа лета под вода, односно умее да нурка и да се движи во водената шир исто како авионите. На крилата има посебни места каде нуркачот ги става рацете и ја држи играчката. Го вклучува електромоторот и подводното патување може да започне. Играчката ве води таму каде вие сакате, односно вие управувате со неа слично како да управувате со велосипед, а малото крилесто пловило го менува правецот. Малку воведно пливање со инструктор, усогласување на вашите движења со рацете за подобра контрола на пловилото наречено „ховерстар акваџет дајв х 2“ и забавата може да започне. Сè е исто како кај авионите и затоа со пловилото можете да изведувате дури и подводни лупинзи. Брзината на пловењето ја определува нуркачот преку тристепениот „менувач“. Не е класичен менувач, но штом брзината на движење се регулира преку него, тогаш тој уред е менувач. Командите од менувачот се наоѓаат на десното крило кај фатот за десната дланка, додека забрзувањето оди преку посебниот уред многу сличен на тој од мотоциклите. „Акваџет х 2“ е пловен објект направен од јаглеродни (карбонски) влакна, лесен е и брзо, се пренесува од едно на друго место, затоа што се расклопува и како такво го сместувате во неговата торба. Моќниот електромотор му овозможува на „акваџет х 2“ да постигне брзина од дури 9 километри на час.
За способноста на моторот производителот Ховерстар нагласува дека може да влече четири возрасни лица без никакви последици по долговечноста на електромоторот.
Подводното летало располага со следниве димензии: распон на крила 106 см, дебелина на трупот 14 см, а пропелерот (елисата) има радиус од 29 см и е покриена со решеткаста капа. Електромоторот ја добива потребната електрична енергија преку батеријата која со едно полнење обезбедува над 100 минути подводна прошетка. Тие што имале прилика да ги посетат коралните гребени и да пливаат заедно со желките и разнобојните риби велат чувството е неповторливо. Подводниот свет на секоја педа е изненадување не само за тие што првпат нуркаат, туку и за поискусните. Да се биде дел од тој свет е нешто многу посебно и доколку се придржувате кон упатствата добиени претходно од стручни лица, тогаш вашата прошетка со „акваџет х 2“ во друштво со подводниот растителен и животински свет ќе претставува вистинско задоволство и уживање.
Но, освен што е наменета за уживање, ова пловило може да се користи и за спасување. Брзината во такви ситуации е од големо знаечење, а токму тоа е една од одликите на „ховеркрафт акваџет х 2“.
Препорачливо е нуркањето, односно подводното возење да не биде на длабочина поголема од пет до седум метри затоа што во спротивно, може да дојде до оштетување на „леталото“ и со тоа да се доведете во опасност.
Целата совршеност и употреблива вредност на „ховерстар акваџет дајв х 2“ ќе чини 799 долари. Пронаоѓачот не гарантира негово сериско производство. Засега производството се одвива ако има нарачки. Тоа е сегашниот начин на работа на проиводителот Ховерстар, а за понатаму не се знае.
ТОП НОВОСТИ
