Подморница-ОТКРИЈТЕ ГО ПОДВОДНИОТ СВЕТ

НЕ МОРА ПАТУВАЊАТА СЕКОГАШ ДА БИДАТ ПОВРЗАНИ СО КОПНОТО, ВОЗДУХОТ И ПЛОВЕЊЕТО ПО ГОЛЕМИТЕ МОРСКИ ПОВРШИНИ. ЗОШТО ДА НЕ БИДАТ И ПОДВОДНИ? АКО ПОСАКУВАТЕ ТАКВО НЕШТО, ТОГАШ „ПРИКАЗНАВА“ Е ТОКМУ КАКО СКРОЕНА ЗА ВАС И ВАШАТА ЉУБОПИТНОСТ

А ко некој ве праша кој дел од планетава најмалку е испитуван, сигурно ќе одговорите дека морињата се најмалку испитувани и верувајте одговорот ќе биде точен. Само еден отсто од светското море е испитано, а остатокот е голема непозната за човештвото. Да се отиде на месечината и подалеку е огромен чекор, но иако морето е „веднаш до нас и секојдневно сме заедно со него“, сепак премногу сме далеку од заедничкиот живот, а хармонијата меѓу човекот и морето засега е само научна фантастика.

Во природата на човекот е да патува, да истражува, да разгледува и сето тоа од едноставна причина да ја задоволи својата љубопитност. Пловењето по морињата е познато уште од дамнешни времиња – колку што е старо човештвото толку е старо и пловењето. Но има едно друго пловење, а тоа е подводното кое е најново за човековиот род. Ако пловењето по површината на водата било крајно едноставно, подводното пловење било сосема непознато речиси до пред еден век. Како што одминува времето така подводните орудија сè повеќе се усовршуваат. Брзиот развој на технологијата допринела подводните пловила да станат достапни и за туристички патувања, односно да бидат во сопственост на љубопитните, исто како што многумина поседуваат моторни возила, летала итн.

Накусо кажано, на Берт Хоутман му здосадило од „еднобојното“ секојдневие и заедно со врвниот пронаоѓач и конструктор Петер Митон тргнуваат во мисија наречена изработка на подморница за сопствени потреби. Првата подморница е наречена „ц квестер“, едносед која ќе послужи како основа за развој на останатите подводни пловила.

Минатиот месец компанијата У Боут Воркс ја претстави најновата подморница наречена „супер суб“ наменета за лична употреба, за туристи, за авантуристи, за љубопитните, но и за научни мисии итн. Во неа удобно можат да се сместат две возрасни лица. Да го нагласиме следново, подводните пловила најчесто не располагаат со којзнае каква удобност, сè со цел да се заштеди на простор, а со тоа се штеди на димензии и секако на крај доаѓа заштедата во тежина, толку многу клучна за подморниците. Напротив, подморницата „супер суб“ во одделот за патници има две одделни седишта, што е своевиден ултра луксуз. Сепак конструкторите направиле отстапки бидејќи ова е пловило за лична употреба и воедно сакале идните сопственици да уживаат во удобноста на патничкиот простор и во разгледувањето на подводниот свет. Затоа може да се каже дека седиштата се исто толку удобни како тие во луксузните автомобили.

Сиот простор за патниците е под стакло, односно одделот всушност е стаклена топка, така што авантуристите имаат безмалку видно поле од 360 степени. Зад кабината се наоѓаат резервоарите и главната пумпа за вода, потоа батериите и четирите пропелери поставени во облик на квадрат, а на горната страна од овој да го наречеме машински оддел се наоѓа вратата за влез во подорницата. Управувањето со подморницата е исто како да играте видео игра на вашиот рачунар. Џојстикот во рака и тоа е сè или платформа иста како за управување со некоја играчка на далечинско управување, само што овде управувате со играчка тешка 9.070 килограми или 9,07 тони. Поради големата тежина пожелно е сопствениците да имаат поголемо теренско возило со мотор не помал од V8. Такво возило е потребно за да може пловилото да биде пренесено од едно море во друго, односно сопствениците да го носат со себе каде ќе посакаат.

Како што наведува производителот, „супер суб“ може да постигне брзина од 8,0 јазли (15 км/ч). За постигнување на оваа брзина се грижи електричниот погон со силина од 80 КС. Крајната длабочина на која подморницата може да се спушти е 1.000 стапки, односно 300 метри. Оваа граница мора строго да се почитува затоа што во подлабоките води притисокот е поголем и подморницата може да биде оштетена или уништена. Најголемиот агол на нуркање е 30 степени, а ист е и најголемиот агол на испловување. Ако ве интересира цената на пловилото „у боут њоркс супер суб“, таа не е обелоденета. За детали, цена и за условите при купувањето, најдобро е да се обратите директно кај производителот.

Инаку името на производителот „у боут воркс“ потекнува од „андрвотер боут“ (подводен брод на македонски), а „воркс“ потекнува од зборот „воркс“, односно „работа“, преведен на македонски, додека името на моделот „супер суб“ води потекло од „супер подморница“ („супер сабмарин“). Денес компанијата У Боут Воркс во својата флота од подморници има примерок кој се спушта на длабочина до 3.000 метри и таа е рекордер меѓу сите од семејството. Подморниците најчесто ги купуваат сопственици на јахти кои во часовите на одмор сакаат да видат каков е тој подморски свет. Производителот нуди на продажба од едносед и сè така до модел со најмногу 11 седишта. И големите компании сопственици на туристички бродови крстосувачи во составот на пловила имаат и подморница или две, купени од компанијата У Боут Воркс.

Жарко Атанасовски