И покрај намалениот интерес за купување електрични возила, Пежо оди напред според претходно утврдениот план. Сега на ред стаса моделот „408“ да биде електричен. Производителот го одржа ветувањето, односно сѐ му оди според планот и следно е светската премиера на Салонот за автомобили во Париз што треба да се одржи од 14 до 20 овој месец.
Исти димензии, ист дизајн, иста внатрешност, а разликата е во погонската единица и во по некоја ситна и незабележлива козметика. Електромоторот ја задвижува предната оска со неговите 210 КС и максимален вртежен момент од 345 Нм. Неговата батерија има „струја“ да извози 453 км, а потоа повторно на полнење. Дополнувањето од 20 до 80 отсто трае половина час, ако се приклучи на брз полнач. За вакво семејно возило од средна класа, би требало да има изведба и со два електромотори и аналогно на тоа, погон на сите тркала, но можно е во блиска иднина Пежо да нѐ изненади.
„Пежо е-408“ е на пат да биде и лимузина, но истовремено и некој вид кросовер, бидејќи во денешно време на класичните лимузини небаре им оди работата. Нешто помеѓу лимузина и сув возило, со должина од 4,7 м и оддел за товар од практични 471 литар и сѐ така до крајни 1.545 л со соборени задни седишта. И да, скиите од цело семејство ќе ги собер внатре, нема потреба од поставување дополнителен багажник на покривот. Има место во „408 – ката“ и за многуте патни торби, а не само за скиите.
Производителот нуди два пакети опрема, алур и гт. Првиот е да речеме обичниот, а тој побогатиот е вториот кој има „матрикс“ светла, греење на седиштата и управувачот, камера за возење наназад итн. Продажбата треба да започне по премиерното издание на претходно спомнатата автомобилска манифестација, но цената сѐ уште официјално не е потврдена, иако јавноста калкулира со цифра од околу 40.000 – 43.000 евра. Најверојатно е веќе обелоденета, но само за тие што направиле нарачка и оставиле капар.
ТОП НОВОСТИ
