Сон на секој колекционер е да има еден и единствен автомобил на светот и потоа истиот да се чува како очи во глава – така почнува и завршува приказната за страстните колекционери. Еден таков колекционер од Мексико нарачал автомобил директно кај мајсторот на мајсторите Џорџето Џугаро, односно компанијата ЏФЏ (Џорџето и Фрабрицио Џуџаро). Дизајнерското студио Џуџаро (читај Италдизајн Џуџаро СПА) е купен од Ламборџини (читај Фолксваген) пред 15 години, а потоа Џ. Џуџаро заедно со неговиот син го основаат студиото ЏГЏ. Ваквите нарачки одат на следниов начин, нарачателот седнува заедно со дизајнерот и разговараат, а за тоа време вработените во фирмата запишуваат (скицираат) сѐ што ќе слушнат. Патем главниот дизајнер додека го слуша нарачателот црта на хартија. Разговарајќи што сака нарачателот, дизајнерот ги прави првите линии од автомобилот, а потоа се договараат деталите. Откако ќе се утврдат сите детали, работата оди во работилница каде се крои автомобилот и се разбира, сѐ е рачно, нема тука конфекција.
„Пералта с“ е супер купе со линија која владеела на планетава во 60. и 70. години од минатиот век – тоа е таа линија на „ламборџини јалпа“, ферари 308, ферари 328“, „де томасо мангуста“ и секако „масерати бумеранг“, дизајнерско дело на Џ. Џуџаро. Споредувајќи го моделот „бумеранг“ со „пералта с“ се приметува од каде е црпена инспирацијата и сѐ останато – „современо прикажување на бумерангов облик“ како што вели синот на Џ. Џуџаро, Фабрицио.
Сребрена метална боја како однадвор, така и во одделот за патниците, а вратите се отвораат заедно со покривот и предното ветробранско стакло, односно вратата е една, нешто слично на капак зацврстен со шарки на крајот од долниот дел на ветробранското стакло. Зошто „пералта с“ и какво е значењето на името? Затоа што нарачател е Карлос Пералта и неговите синови Хуан Карлос и Николас. Цена? Кога зборуваме за вакви автомобили, цената воопшто не е важна. Автомобилот за првпат беше прикажан пред околу еден месец (15 и 16 март) на престижниот собир на автомобили Пастехе Аутомотив Инвитејшнл, манифестација што традиционално секоја година се одржува во Мексико Сити. Засега, податоците за автомобилот се многу оскудни. Можеби подоцна ЏФЏ ќе се смилува и ќе каже нешто повеќе.
ТОП НОВОСТИ
