Олдтајмери-Citroen Dijana-ПРИКАЗНА ШТО ТРАЕ ПОВЕЌЕ ОД ЧЕТИРИ ДЕЦЕНИИ

УДОБНО ФАМИЛИЈАРНО ВОЗЕЊЕ И УЖИВАЊЕ НА ТОПЛОТО СОНЦЕ… ТОА Е СЛОГАНОТ ШТО НИ ГО КАЖА КИРИЛ АМПОВ, СОПСТВЕНИК НА ЕДЕН ОД НАЈДОБРИТЕ ПРИМЕРОЦИ ШТО ГИ ИМА КАЈ НАС… ЦИТРОЕН ДИЈАНA

Автомобил со тежина од 600 кг, со кој се совладува секој свијок при поголема брзина, при што максимално е стабилен, а во неговото возење уживаат возачот и сопатниците е најдобар опис на моделот Citroёn Dyane. Вака вели Кирил Ампов, сопственик на една прекрасна „дијана“ од 1979 година.

Кирил е роден 1982 година и првото возење од породилиштето до дома му било токму со овој модел на автомобил што го поседувал татко му, а нов го купил во 1978 година.

Имено, првата „дијана“ што ја имале во семејството била жолта и со неа поминале повеќе од половина милион километри без поголеми проблеми. За жал, во 2009 година го продале автомобилот.

Поради поврзаноста со овој автомобил, Кире се впуштил во потрага по таков модел што, како што вели, ќе го врати во детството кога се возел со отворен покрив спиејќи на задното седиште. Потрагата по ваков автомобил успешно завршила.

Во 2018 година Кире нашол ваков модел на „дијана“ и ја реставрирал речиси до последното штрафче. Автомобилот добил фабрички изглед и Кире со него реализирал безброј патувања во земјата и надвор од неа истакнувајќи дека за само пет-шест викенди поминал над 5.000 км.

Иако избира дестинации за патување, кога ќе стигне до посакуваната локација, сепак, продолжува да вози, а исклучително задоволство му предизвикува тоа што неговата ќерка и сопругата уживаат додека заедно патуваат со неговата „дијана“, со која мамат насмевки и поздравувања од минувачите или другите учесници во сообраќајот…

Тој поседува и други возила од марката Цитроен, за кои вели дека му се омилени, но љубовта кон автомобилот „дијана“ е најголема, особено звукот на моторот што за Кирил е посебна музика што трае до ден-денес….. Кирил го пофали членското списание АМСМ КЛУБ МОБИЛИТИ, кое навистина ù посветува внимание на категоријата стари автомобили што се спомен на едно минато време. На Кирил му посакуваме уште многу километри удобно возење со неговата „дијана“…

Андријан Трипунов