Моделот „патрол“ е најобожуван и најбаран од сите што возат низ пустинските и на нив слични предели, односно негостољубиви пространства. Тоа значи дека Нисан направил теренско возило да се движи по секакви подлоги и во секакви временски (метео) услови.
Штом „нисан патрол“ има силна поддршка насекаде во светот, тогаш можеме да кажеме дека производителот згрешил кога во 2010 год. го повлекол „патролот“ од европскиот пазар. Од засега неразјаснети причини „патролот“ сѐ уште е надвор од игра на континентов. Зошто е тоа така најдобро знае производителот. За непристапни терени потребни се проверени и снажни погонски единици. Новиот „патрол“ располага со две V6 погонски единици. Едната има зафатнина од 3,8 литри и моќност од 316 КС и 386 Нм, а другата има двоен турбо полнач и со него постигнува 425 КС и солидни 700 Нм максимален вртежен момент. Овој мотор е со работна зафатнина од 3,5 л. Погонот е на сите тркала преку автоматски менувач, но возачот може да избере погон само на задните тркала, доколку вози на автопат. Така се заштедува на гориво, не мора погонот на сите тркала постојано да биде вклучен.
Седмата, најнова, генерација на „нисан патрол“ веќе е во продажба на јапонскиот пазар. Таму моделот е наречен „сафари“, а некаде по светов го носи името „армада“. Понекогаш моделите имаат различни имиња за различни пазари и сето тоа во зависност од побарувачката и специфичноста на пазарот.
Поради грандиозните димензии (5.205 мм х 2.030 мм х 1.955 мм) во одделот за патници има три реда седишта. Ако нарачате три пати по две, тогаш удобно ќе се возат шест лица, но ако нарачате класични две задни клупи, тогаш возилото ќе прими осум патници. Сѐ зависи од тоа каква конфигурација ќе нарачате. Штом сме во внатрешноста да ги спомнеме 12 звучници од марката Клипш кои се добиваат сериски во изведбата „про 4 икс“, а со доплата во сите други изведби. Таа „про 4 икс“ изведба е оддалечена од тлото дури 244 мм или за 10 мм повеќе од претходната генерација.
Што се однесува до дизајнот, тој сега е строго класичен, како времето да се враќа назад, меките линии кои повеќе или помалку потсетуваа на разбранувана вода се напуштени затоа што светот ја сака класиката, а најмногу кај теренските возила.
ТОП НОВОСТИ
