ПОТРЕБЕН ВИ Е ВИСТИНСКИ ОДМОР ОД ГРАДСКОТО СИВИЛО, ДАЛЕКУ ОД ВРЕВАТА И БУЧАВАТА, А АКО ИМАТЕ ДЕНОВИ ОД ГОДИШНИОТ ОДМОР МАКАР И ЗА САМО ЕДЕН ПРОДОЛЖЕН ВИКЕНД, СЛЕДНА ДЕСТИНАЦИЈА НЕКА ВИ БИДЕ МАНАСТИРСКИОТ КОМПЛЕКС „СВ. ЈОАКИМ ОСОГОВСКИ“ ВО НЕПОСРЕДНА БЛИЗИНА НА КРИВА ПАЛАНКА. ДОЈДЕТЕ И УВЕРЕТЕ СЕ ДЕКА ВЕ ЧЕКА ВИСТИНСКИ ОДМОР ЗА ДУША И ТЕЛО КАДЕ ШТО ЌЕ УЖИВАТЕ
Манастирскиот комплекс „Св. Јоаким Осоговски“ се наоѓа на падините на Осоговските Планини на надморска височина од 860 метри. До него водат два современи асфалтирани патишта оддалечени само три километри од Крива Паланка или 2,5 километри од патот каде што почнува шумата. Располага со голем паркинг-простор што е бесплатен за сите посетители, а манастирските конаци преуредени во хотел-ресторан, ви нудат единствена можност да уживате во природата и во мирот. Тука се наоѓаат и две цркви, „Раѓање на св. Богородица“ и „Св. Јоаким Осоговски“, со долга и богата историја, едни од најубавите во земјава и на Балканот.
ИСТОРИЈА НА МАНАСТИРСКИОТ КОМПЛЕКС „СВ. ЈОАКИМ ОСОГОВСКИ“
Овој манастирски комплекс, распослан на подножјето на Осоговските Планини, среде густа дабова шума, е еден од најмонументалните и најамбиенталните манастири што плени со својата долга десетвековна историја.
Манастирот е изграден уште во 12 век на местото каде што се подвизувал (се упатувал на подвиг кон христијански живот) св. Јоаким Осоговски. Црквата посветена на светителот е изградена во 18 век и во неа почиваат чудотворните мошти на св. Јоаким. Таа е изградена од најпознатиот градител на цркви на Балканот, Андреја Дамјанов, родум од велешкото село Папрадиште, од каде што потекнува и зографот на црквата, познатиот Димитрие Андонов Папрадишки. До неа се наоѓа малата, но значајна црква „Раѓањето на света Богородица“, за која се претпоставува дека датира од крајот на 11 век, а која повеќепати била уривана и обновувана низ вековите. И таа е живописана од Димитрие Андонов Папрадишки, а зачувани се и фрагменти од орнаментиката од најстариот живoпис. Оваа црква повторно е возобновена во 90-тите години од 20 век и е една од првите цркви во земјава што повторно е живописана во 1995 година со одобрение од митрополитот Кирил, а средствата се обезбедени од повеќе дарители.
Во своето десетвековно постоење манастирот „Св. Јоаким Осоговски“ никогаш не го нарушил светото духовно и културно живеење, а народот преку него ја градел својата вера и традиција, пренесувајќи го христијанскиот дух и во најтешките времиња сѐ до денес.
Манастирска слава е 28 август, воскресение на Пресвета Богородица, кога во манастирскиот комплекс пристигнуваат гости од регионот и од цела земја. Исто така, малата црква „Рождество на св. Богородица“ го слави 21 септември.
Значајно е да се спомене дека манастирот е место каде што се родила просветната дејност, а во 19 век во него престојувал и творел и Јоаким Крчовски, првиот македонски книжевник и преродбеник.
Посебноста на Осоговскиот манастир е во тоа што е единствен православен храм во кој може да се сретне турски заштитен знак, кој и денес стои веднаш до големата манастирска црква. Овој камен – симбол (столпче со турбан во средината) сведочи за посебниот третман што го имал манастирот за време на отоманското владеење на нашите простори и служел како заштита од уништување од тогашните турски власти и никој не смеел да посегне по светоста на манастирот. На влезот на големата манастирска црква има запис што сведочи дека манастирот бил ставен под заштита на султанот Хамид во 1884 година. Се смета дека и самиот ја доживеал немоќта на своите аскери пред чудотворната моќ на св. Јоаким Осоговски и потпишал „ираде“ за обновување на манастирот.
МЕЃУНАРОДНА ЛИКОВНА КОЛОНИЈА „СВЕТИ ЈОАКИМ ОСОГОВСКИ“
На 5 септември 1987 година се остварила идејата за ново содржинско осмислување и ревитализација на манастирските конаци преку основање на Ликовната колонија „Св. Јоаким Осоговски“. Идејата и иницијативата за нејзино основање потекнала од познатиот академски сликар Петар Мазев, кои биле поддржани од неговите колеги Димитар Стојчевски, Никола Иванов-Балтон, Златко Стефанов и Јордан Михајловски, со поддршка на митрополитот полошко-кумановски господин Кирил.
Како што за АМСМ Клуб Мобилите информира Јордан Михајловски, во практика тоа значело отворање на портите на манастирот „Свети Јоаким Осоговски“ за уметноста и за неистражените форми на духот.
– Почетокот беше означен како возобновување на десет века старата традиција во манастирот, како културен, едукативен и духовен центар, вели Михајловски.
Ликовната колонија, која работи под покровителство на МПЦ, годинава се одржа по 35. пат од 8 до 14 септември, располага со две збирки од околу 500-600 дела, едната се наоѓа во Центарот за култура во Крива Паланка и содржи дела создадени од 1987 до 1998 година, втората е од 1998 година до денес и делата од оваа збирка се наоѓаат во манастирскиот комплекс „Св. Јоким Осоговски“, а има слики и во гостинските соби. Помал дел од сликите се во Дељадровскиот манастир помеѓу Скопје и Куманово, каде што почива митрополитот Кирил.
Во ликовната колонија досега учествуваа 500 ликовни творци од речиси сите континенти.
-Создадени се прекрасни дела и повеќето од нив го носат печатот на овој исклучителен амбиент. Сите овие години колонијата го задржа основниот принцип да биде оаза на духот и на културата за слобода на творештвото затоа што се работи по слободен тематски принцип. Уметниците што доаѓаат го носат печатот од сопствените култури во своите земји, но тука се случува културна конфронтација на меѓусебните влијанија, а во секој случај тоа е многу значајно за сликарството, потенцира Михајловски.
Тој вели дека сѐ додека постои манастирскиот комплекс „Свети Јоаким Осоговски“ завет за сегашните и за идните генерации е да опстанува и да работи и оваа значајна ликовна колонија.
ОД ОСОГОВСКИОТ МАНАСТИР ДО КАЛИН КАМЕН
По три часа пешачење од манастирот „Свети Јоаким Осоговски“ или со автомобил за дваесеттина минути по асфалтен пат најпрво ќе стигнете до месноста Ловечка куќа, оддалечена 8 километри од манастирскиот комплекс. Тука се наоѓаат мали куќички за одмор, изградени во времето на социјализмот, за летување на работниците и чешма од која тече ладна планинска вода. Веднаш до нив има детски парк со различни реквизити, како и игралиште за кошарка. Над нив има букова шума со раскошна убавина. Подолу од патот се изградени повеќе викенд-куќи. На местото за одмор има клупи со маси, а над игралиштето и дрвен видиковец со клупи и маса каде што можете скриени во сенка да се одморите и да каснете сендвич, па да се напиете планинска вода и да уживате во глетката дишејќи чист планински воздух.
По краткиот одмор кај Ловечка куќа продолжувате и по еден-два километра доаѓате до малото вештачко езерце во чија близина е големата карпа што месното население ја нарекло Калин Камен. Токму оваа карпа е причината поради која многубројните туристи пешачат по три-четири часа, а последниве години се повеќе посетители доаѓаат со автомобили бидејќи убавиот асфалтен пат води до езерцето. Веднаш до него е и Калин Камен.
Според легендата од пред неколку века, во времето на Отоманската Империја во Кривопаланечкиот Регион живеела млада девојка што била најубава од сите девојки. Од нејзината убавина бил воодушевен турскиот ага, кој ја грабнал Калина и ја затворил во својот сарај. Таа не сакала да се потурчи и да му биде жена на агата, па една ноќ избегала од сарајот и се упатила кон каменот под Царев Врв. Патот го поминала за четири часа. Таа ноќ Калина се фрлила од карпата и во нејзина чест народот ја нарекол карпата Калин Камен. Подоцна оваа месност била населена од влашки семејства што се занимавале со сточарство и одгледувале илјадници грла овци, кози, говеда и коњи. Власите кои живееле на Калин Камен биле познати по квалитетот на овците и пастрмата. Секоја година на 28 август, на празникот на „Св. Јоаким Осоговски“, Власите му дарувале по 200 овци и јагниња на манастирот.
Калин Камен е на надморска височина од 1.870 метри и претставува еден од најубавите врвови на Осоговските Планини. Тука има преубави скијачки патеки.
Во 2009 година првпат се организираше ревијално рели на погон на четири тркала. Денес е интересно и по одржувањето на туристичкото рели Калин Камен. Оваа манифестација се одржува од 2009 година по иницијатива на оф-роуд возачите, а во организација на Општина Крива Паланка и Здружението на граѓани Авто мото клуб „Оф-роад Осогово“. Се одржува секоја година на 24 мај, Денот на сесловенските браќа св. Кирил и Методиј, но поради пандемијата со коронавирусот годинава се одржа во септември.
Должината на патеката е 64 километри, а 80 отсто од неа се одвива по неасфалтиран пат. Висинската разлика помеѓу најниската и највисоката точка Царев Врв (2.085 метри надморска висчина ) е 1.500 метри. Патувањето трае околу 8 часа со паузи и притоа може да се доживеат сите четири годишни времиња, дожд, сонце, ветер, па и снежна покривка. На многубројните пасишта на Осоговските Планини галопираат диви коњи. Посетете го ова прекрасно место на македонските планини и исполнете се со убавина, мир и спокој.
ТОП НОВОСТИ
