Митсуока Моторс е десеттиот јапонски производител на автомобили според тамошниот прецизно воден список, а колку за информација деветтиот е Хонда. Кој како се појавувал, така е запишуван во списокот на производители на моторни возила. Сепак веднаш мора да напоменеме, производителот Митсуока Моторс е премногу специфичен – своите автомобили ги прави на основа од било кој друг автомобил, но дизајнот е старовремски, како на пример автомобилите од 60 год. од минатиот век. Овој производител најмногу го негува дизајнот на некогашните европски и американски автомобили.
Најновото од Митсуока е класика од купе, значи двосед, со основа позајмена од „мазда м икс 5“. Светски најпродаваниот кабриолет нема ни 4,0 метри во должина, но затоа моделот „химико“ на Митсуока е долг 4,58 м, широк 1,74 и 1.235 м висок. Таа плус должина е додадена во предниот дел. Некогаш купе автомобилите биле ценети по нивниот долг преден дел, а далеку назад се двете седишта. Според обликот, „митсуока химико“ потсетува на многу автомобили од ’60 год. од минатиот век, така што не може точно да кажеме на кој автомобил најмногу потсетува. Погонската единица е бензинска со четири цилиндри во линија со зафатнина од 1,5 литри. Првата генерација се појави во 2008 год. и тогаш моторот беше поголем, 2,0 литри. Од 2018 се појави втората генерација и сега ова е обновување или трета генерација. Силината, односно 131 КС од тој помал 1,5 литарски мотор сместен напред, се пренесува на задната оска преку обичен менувач со шест степени.
„Митсуока химико“ е рачна изработка и сѐ е подредено на луксуз, затоа да не ве чуди цената од 43.000 евра, а името на старо јапонски јазик значи „дете на сонцето“ (девојче на сонцето, сончева принцеза). Кон ова мора да го додадеме и следново, класиката од купе кабриолет ќе биде произведена само во 10 примероци. Ете како одат работите со обновените модели во Митсуока, најмладиот и воедно најмалиот јапонски производител на автомобили.
ТОП НОВОСТИ
