Во својот состав Митсубиши отсекогаш имал и сѐ уште има неколку теренски модели и воопшто не му било тешко од нив да изведе „сув“ возила. Ако некој е познат во светот по теренските возила тогаш тоа е Митсубиши бидејќи е најтрофеен на релито Дакар, најтешкото што постои на планетава. Затоа треба да се воздржиме од непотребни коментари упатени кон оваа марка. Од неговото прво појавување на европско тло во 2013 год. до денес се продадени над 200.000 „аутлендери“, бројка која говори за солидниот одзив на купувачите.
Четвртата генерација од популарниот модел стаса порано на другите континенти, а за европскиот пазар беше претставен овој месец. Вообичаена пракса на сите производители е некои модели посебно да ги подготвуваат за континенталниот пазар.
Хибридниот модел со приклучок содржи еден ото мотор со зафатнина од 2,4 л и два електромотори. Нивната вкупна силина е еднаква на 306 КС кои успешно се справуват со два тони тешкото возило, односно од 0 до 100 км/ч потребни му се само 7,9 сек. Со помош на електромоторите и полна батерија може да измине 86 км, додека заедно со бензинскиот мотор новиот „аутлендер“ изминува супериорни 844 км.
За патниците се обезбедени пет седишта сместени во следниве димензии, должина 4.719, ширина 1.862 и висина 1.750 мм, а растојанието меѓу оските изнесува 2.704 мм. Одделот за товар има најмалку 495 л, односно најмногу 1.404 л. Вистински семеен сув и згора на тоа аудио уредот е од марката Јамаха модел „динамик саунд“. Значи јапонски двоец, возило + аудио уред од домашно производство за поголема удобност.
Тоа со ото моторот нема да им се допадне на македонските купувачи. Ние овде како да сме претплатени за дизел мотори, но можеби Митсубиши ќе се смилува и ќе вгради дизел. Да видиме што ќе се случи.
ТОП НОВОСТИ
