Од неколкуте светски премиери кои се случија на Салонот за автомобили во Женева беше и „тројката“ од МГ. На оваа марка не и цветаа розите сѐ додека не беше купена од кинеската компанија САИК Моторс. Сега работите се поинакви и на крајот од минатиот месец во Женева, МГ ја претставија третата генерација од моделот „3“. Според димензиите, најновава генерација е најголема со 2.570 мм растојание меѓу оските, должина 4.113 мм, ширина 1.797 мм и висина 1.502 мм. Насетувате дека „тројката“ од МГ е во класата на некогашните „фиат пунто“, „форд фиеста“ и „киа рио“ или денешните „цитроен ц 3“, „пежо 208“, „сеат ибица“ и останатите од класата. Зошто и како претходната генерација не се продаваше на континентов, не е познато, но белким третава (трета среќа) ќе допатува и кај нас. На стартот од продажбата во понуда ќе биде само хибридната изведба, а потоа ќе следат, таа само со бензински мотор и таа целосно електрифицираната.
Хибридната нема приклучок за полнење, туку генератор за надополнување на батеријата. Класичниот мотор е бензински 1,5 литарски со три цилиндри и 102 КС, додека електричниот има 132 КС. Вкупната силина изнесува 194 КС со кои возилото постигнува 100 км/ч тргнувајќи од место за 8,0 сек. Таа силина е електронски поделена на три режими возење: еко, стандард и спорт. Најмногу километри се изминуваат во „еко“ режимот, додека најмалку во „спорт“. А опремата е поделена на стандард, комфорт и луксуз. Да, и екрани има, денес тие се неизбежни, без нив не се може, станаа најважен дел во автомобилот – тој пред возачот има дијагонала од седум инчи, а средишниот 10,25.
Засега е не се знае кога новиот „мг 3“ ќе биде пуштен во продажба кај нас, но за подетални информации, најдобро е да се јавите кај увозникот.
ТОП НОВОСТИ
