ВО ВРЕМЕ КОГА ИНОВАЦИИТЕ И ОДРЖЛИВОСТА ЈА ДИКТИРААТ ИДНИНАТА НА АВТОМОБИЛСКАТА ИНДУСТРИЈА, ПРОИЗВОДИТЕЛИТЕ ПОСТОЈАНО БАРААТ НОВИ НАЧИНИ ДА СЕ ДОБЛИЖАТ ДО КУПУВАЧИТЕ. НЕКОИ ОДАТ ЧЕКОР ПОНАТАМУ И СОЗДАВААТ СОСЕМА НОВИ БРЕНДОВИ СО СВЕЖ ПРИСТАП, КАКО ШТО Е ПРИМЕРОТ СО LYNK & CO. НИВНИОТ ПРВ МОДЕЛ, 01 PHEV, ПРЕТСТАВУВА ВИЗИЈА ЗА АВТОМОБИЛ КОЈ ОБЕДИНУВА ЕФИКАСНОСТ, ВРВНИ ПЕРФОРМАНСИ И ПРЕФИНЕТ ДИЗАЈН
ИНСПИРАЦИЈА ОД ДВЕТЕ СТРАНИ НА СВЕТОТ
Lynk & Co е глобален бренд кој е резултат на соработката помеѓу Geely Auto Group и Volvo Car Group. Со модерен пристап кон мобилноста, брендот ги предизвикува традиционалните стандарди во автомобилската индустрија. Дизајнот е создаден во Шведска, додека производството се одвива во најсовремените фабрики на Geely во Кина. Благодарение на оваа поврзаност, Lynk & Co 01 користи идентична платформа и технолошки решенија како Volvo XC40.
Lynk & Co 01 е возило што ја комбинира модерната скандинавска естетика со иновативниот кинески дизајн, создавајќи уникатна и впечатлива креација. Неговата надворешност изобилува со елементи што истовремено оддаваат премиум чувство и авангарден пристап, истакнувајќи ја неговата урбана и футуристичка природа. Предниот дел на Lynk & Co 01 е еден од највпечатливите аспекти на неговиот дизајн. Доминираат тенките, хоризонтални LED светла позиционирани на врвот на хаубата, што му даваат остар и агресивен изглед. Светлата за дневно возење се интегрирани како дел од овој карактеристичен „поглед”, додека главните светла се поставени пониско на браникот, што дополнително го нагласува неговиот иновативен дизајн. Предната решетка е изведена минималистички, со линија во сина боја која се протега под неа како суптилен детаљ, што додава доза на индивидуалност. Страничниот профил има чисти и динамични линии, што воедно создаваат елегантна, но моќна силуета. Покривната линија благо се спушта наназад, што му дава кросовер-купе изглед, додека црниот покрив и контрастните сино обоени елементи додаваат спортски карактер. Неговите 20-инчни алуминиумски фелни со уникатен дизајн и сини детали совршено го заокружуваат профилот на модерен автомобил. Задниот дел ја продолжува футуристичката тема која ја сретнувате на предниот крај. Широката и хоризонтално поставена LED светлосна група визуелно го проширува автомобилот.
Логото на брендот гордо е поставено во центарот на петата врата, додека под него се наоѓа минималистички обликуваниот браник со дифузер. Спортските двојни издувни цевки ја потенцираат неговата динамика, додека задниот спојлер е тука да го дополни аеродинамичен профил. Со својата уникатна надворешност, моделот 01 не е само SUV, туку изјава за индивидуалност и урбана софистицираност, совршено вклопувајќи се во современиот стил на живот. Мала е веројатноста да го помешате со возило од друг бренд, како појава се разликува од кој било друг кросовер на пазарот во моментов, но во исто време не претерува во поглед на дизајнот.
ИНТЕЛИГЕНТНА СРЕДИНА
Внатрешноста кај моделот 01 зрачи со современа естетика која е инспирирана од скандинавскиот минимализам, но со динамични акценти кои додаваат младешки карактер. Повеќето површини се обложени со иновативни меки на допир материјали, што само по себе додава чувство од повисоката класа. Нивниот квалитет игра улога доминантна во интеграција со акцентирани детали кои се дискретно поставени во кабината и ја нагласуваат софистицираната природа на возилото. Пространата внатрешност е ергономски оптимизирана, нудејќи максимална удобност за сите патници. Седиштата предни се дизајнирани со комфор во прв план, одлични за долги патувања, со завидно ниво на прилагодување и добра странична потпора. За патниците на седиштата задни се обезбедени пространи позиции што овозможуваат доволно место за нозете и главата, дури и за нестандардно високи патници. Дополнително, задната клупа може да се преклопи во сооднос 60:40, ослободувајќи повеќе простор за багаж (до 1.213 литри) секако, доколку не ви се доволни оние 466 литри со кои располага во стандардната конфигурација. Како и што доликува, моделот 01 е опремен со најсовремена технологија, што го прави вистински интелигентен SUV. Во центарот на кабината се наоѓа голем 12,7 инчен централен екран на допир, преку кој се контролираат сите инфозабавни и функционални системи. Екранот е интуитивен, со брз одзив и модерен интерфејс кој постојано се обновува, воедно поддржува Android Auto и Apple CarPlay поврзување без употреба на кабел. Сите примарни информации, возачот ги добива преку 12,3 инчен дигитален инструмент панел, кој може да се прилагоди според потребите. Од информации за брзина и потрошувачка, до навигација и предупредувања за безбедност, сè е изведено јасно и лесно читливо. Внатрешноста на моделот 01 создава извонредно балансирана средина каде висококвалитетните материјали и современите технологии создаваат комфорно искуство за сите патници.
ТЕХНИЧКИ КАРАКТЕРИСТИКИ НА ВОЗИЛОТО
| МОТОР: | ЧЕТИРИЦИЛИНДРИЧЕН ТУРБОБЕНЗИНЕЦ |
| ЗАФАТНИНА: | 2.488CM3 |
| МОЌНОСТ НА АГРЕГАТОТ: |
183 КС При 4.000 врт/мин |
| МЕНУВАЧ: | БЕЗСТЕПЕН CVT МЕНУВАЧ |
| ПОГОН: | НА СИТЕ 4 ТРКАЛА |
| ПОТПИРАЊЕ НА ТРКАЛА: |
НАПРЕД: MCPHERSON НАЗАД: MULTILINK |
| СОПИРАЧКИ: | НАПРЕД: ВЕНТИЛИРАЧКИ ДИСКОВИ НАЗАД: ДИСКОВИ |
| ГУМИ: | НАПРЕД 225/60 R18, ПОЗАДИ 225/60 R18 |
| МАСА НА ВОЗИЛОТО: |
1.690 КГ |
| ДИМЕНЗИИ: Д/Ш/В: |
4.645Х1.8.82Х1.683 ММ |
| ЗАБРЗУВАЊЕ ОД 0 ДО 100 КМ/Ч: |
8.3 СЕКУНДИ |
| ПРОСЕЧНА ПОТРОШУВАЧКА: |
5.8 ЛИТ/100 КМ |
| МАКСИМАЛНА БРЗИНА: |
196 КМ/Ч |
| ЦЕНА НА ТЕСТИРАНИОТ МОДЕЛ: |
54.900 ЕВРА |
ЕФИКАСНОСТ И ПЕРФОРМАНСИ
Основата на моделот 01 PHEV е неговиот напреден погонски систем кој комбинира 1.5 литарски трицилиндерски турбо бензински агрегат и електричен мотор. Бензинецот произведува 180 КС и 265 Нм вртежен момент, што и самите по себе се доволни за динамично возење. Но, во комбинација со електричниот мотор од 60 kW (81 КС), системот генерира вкупна моќност од 261 коњски сили, што овозможува солидна агилност. Флексибилноста на возилото во случајов доаѓа до израз преку три режими на возење. Во „Pure Mode“ работи само електромоторот кој ја црпи силата од литиум-јонската батерија со корисен капацитет од 14.1 kWh (бруто 17,6 kWh) и декларирани 75 километри електрична автономија, што во реалниот свет е за 10% помалку. Сепак, електричниот опсег го прави овој модел идеален за секојдневно градско возење без употреба на течно гориво.
Дополнително, батеријата е оптимизирана за регенеративно полнење при сопирање, што ја зголемува нејзината ефикасност. Полнењето на батеријата во домашни услови трае 7 часа, истата процедура на брз полнач се одвива за неполни 2,5 часа. Во Hybrid Mode моделот 01 ја комбинира работата на двата двигатели, со цел да овозможи соодветен баланс помеѓу перформансите и ниската потрошувачка. Системот за интелигентно управување со енергијата автоматски распределува моќност помеѓу бензинскиот и електричниот мотор, зависно од условите на патот и начинот на возење, што резултира со мазно и пријатно возачко искуство. На крајот тука е и „Sport Mode“ режимот на работа кој е задолжен за максимална моќност и динамика на возење, ослободувајќи ја целата сила на двете погонски единици. За трансферот на силата е задолжен 7 степен автоматски менувач со двојна спојка кој го носи од место на мирување до 100 км/ч за 8 секунди и максимални 210 км/ч. Кога станува збор за потрошувачката објаснувањето е малку покомплицирано. Имено, производителот декларира 1,2 л/100 км, што ние не успеавме да постигнеме. Мерачот покажа просек од 7,3 литри, но тоа се постигнувања од како беа потрошени сите „електрони“ од батеријата, што е сосема коректен резултат за возило кое е блиску до границата од 2 тони сопствена тежина. Како дел од растечкиот сегмент на plug-in хибриди, SUV моделот 01 е идеално тивок и еколошки во урбани средини, цврсто поставен и комфорен на подолги патувања, но и динамичен со перформанси кои не се потценување кога тоа од него ќе се побара.
Она што пред само десет години беше значаен јаз меѓу етаблираните автомобилски производители и новите играчи на пазарот, денес речиси целосно исчезнува. Новите брендови покажуваат невидено брзо темпо на развој, рушејќи ги традиционалните граници на автомобилската индустрија. Оттука, 01 PHEV несомнено се наметнува со проверен хибриден склоп, високото ниво на изработка, прецизно избраните материјали, напредните технолошки решенија и богат спектар на сигурносни системи. Сето тоа е заокружено со модерен дизајн кој магнетно го привлекува вниманието.
ТОП НОВОСТИ
