Најмалиот „сув“ на Лексус доби малку спортска нота и од најобичен градски крстосувач, конструкторите го претворија во расно тркачко грло. За сиот овој „хаос“ на некој начин e „виновен“, претседателот Акио Тојода, првата виолина во оркестарот наречен Тојота и Лексус.
На почетокот од годинава во Токио се одржа саемска изложба на фризирани автомобили. Таму секој претстави тоа што подготвил во гаражата, работилницата, лабораторијата, а Лексус го изложи моделот „л б икс“ во концепт изведба. Во меѓувреме, Акио Тојода решил да ги повика конструкторите, мајсторите кои работеле на концептот и им дал зелено светло да тргнат во поход, односно концептот да го претворат во сериски модел. Сепак не е сериски, но за тоа ќе кажеме некаде при крајот од текстов.
Авторите на концептот најнапред го именувале возилото како „л б икс морицо рр“, кое допрва ќе го прават во манирот на концептот. Во сув возилото со должина од 4.190 мм (1.840 мм ширина, 1.535 мм висина и меѓуоскино 2.580 мм) вградиле мотор, поточно го позајмиле од, ни помалку ни повеќе туку, од „гр јарис“. Тоа е погонски состав од три цилиндри во линија со турбо полнач, 1,5 литри работна зафатнина и сосема солидни 300 КС кои 1,44 тони тешкиот сув може да го понесе до 100 км/ч за 5,2 сек. За „лексус л б икс морицо рр“ има два менувачи, еден со шест, а другиот со осум степени. Првиот е обичен, за тие што сакаат да менуваат брзини по свој мерак и ритам, а вториот е автоматски.
Сега доаѓаме за загатката со сериското производство. Само 100 примероци ќе бидат произведени од супер сув возилото „лексус л б икс морицо рр“, а продажбата ќе се одвива по случаен избор, нешто како лотарија.
ТОП НОВОСТИ
