ДОБРО ОДМОРЕНИ, НАСПАНИ И НАЈАДЕНИ, МАЛКУ ВОДА, НЕКОЛКУ КАПКИ СОК ОД ЛИМОН, УДОБНА ОБЛЕКА ВО СВЕТЛИ БОИ, ОЧИЛА ЗА СОНЦЕ, КАПА И ПОДГОТВЕНИ СТЕ ДА Ѝ СЕ СПРОТИВСТАВИТЕ НА ЛЕТНАТА ГОРЕШТИНА
Летото е период кога сите се подготвуваат да заминат на одмор, на планина, море, езеро, да се посетат интересни места во други држави итн. Главна одлика на летото се високите температури и тие се нешто најнепосакуваното за секој што е во автомобил. Но и ова патување може да се претвори во уживање. Ако одлучите да патувате со автомобил, еве неколку совети што ќе ви бидат од голема корист.
Прво што ви паѓа на памет кога треба да седнете во автомобил изложен на сонце е да го вклучите клима-уредот. Секако, со тоа ќе се подобри состојбата во делот за патници, но внимавајте со нагодувањето. Задолжително мора да се внимава на нагодувањето на температурата во автомобилот во однос на надворешната затоа што преголемата температурна разлика при излегувањето од возилото кај чувствителните лица може да предизвика температурен шок и сериозни нарушувања во организмот. Оваа состојба може да се спореди со сончањето на плажа и влегувањето во вода. Поради тоа клима-уредот треба да се нагоди на околу +29 С степени. Најпрепорачливо е температурната разлика во возилото и надвор да не биде поголема од 8 С степени. На пример, ако надвор е + 38 С степени, климата да биде пуштена на + 30 С степени.
Можно е да се случи ниската температура во автомобилот да предизвика и други проблеми – настинка, главоболка, појава на болки во дел од телото што најмногу бил изложен на студениот воздух и да дојде до здрвување. Особено треба да бидат внимателни лицата што имаат каков било проблем со бубрезите. Како да се подготвите за патување? Прво и основно, добро одморете се, наспијте се и јадете пред да тргнете на патувањето. Задолжително понесете неколку шишиња со вода во кои може да ставите по неколку капки лимонов сок. Пожелно е при рака да има+те и обична прскалка што може да ви помогне да се разладите. Не заборавајте очила за сонце и капа. Облеката треба да биде во светла боја, комотна и изработена од природни материјали. Лекарите не препорачуваат на патувањето да се пијат газирани сокови и ладни чаеви затоа што тие дополнително предизвикуваат жед. Но во никој случај алкохол. Комбинацијата од летна горештина и алкохол создава многу проблеми.
Добро е автомобилот да биде под сенка пред да тргнете. Кога ќе почувствувате дека ви станува мачно да возите на жешкото сонце, побарајте место за одмор во сенка. Избегнувајте да возите во периодот од денот кога температурите се највисоки. Препорачливо е да не пиете вода од чешма во местото на престој за да избегнете стомачни проблеми. Не јадете кечап и мајонез, кои се најподложни на расипување, разни преработки, салами и слично, туку салати и малку тестенини. Спакувајте се навреме, два дена однапред за да не си создавате нервози. Не дозволувајте топлото време да ви го наруши расположението за време на патувањето и да ве направи нервозни. Применете ги советите и уживајте во патувањето. Почитувајте ја сигнализација и внимавајте на брзината.
ТОП НОВОСТИ
