Откако Ланча доби зелено светло дека може да продолжи со работа, тамошните челници излегоа со следниов став, Ланча отсега натаму ќе има исклучиво електрични мотори. Тоа беше тогаш, а во февруари оваа година за време на светската премиера на моделот „ипсилон“ веста беше потврдена. Стаса моделот „ланча“ до јавноста, на полигонот Балоко беа претставени нејзините возни својства и способности, но челниците како да заборавија што кажуваа претходно. Затоа на полигонот покрај електричните, беа тестирани и тие со хибриден погон. „Ипсилон рели 4 хф“ е изведба наменета исклучиво за натпреварување во рели. Сигурно дека ќе биде во рели, таму Ланча на времето направи „пепел“ и сега како да сака да се врати на старите патеки. Меѓутоа на Ланча не и се брза, туку почнува од најниската класа, да ја наречеме пионерска. Најнапред ќе оди во домашното првенство со шест трки и кој ќе победи, ќе вози на европското првенство во 2026 год. во тимот Ланча Корсе ХФ. „Ипсилон рели 4 хф“ е автомобил за младите возачи кои сакаат да научат нешто повеќе за рели возењето, односно да почне дијамантот да се бруси. Ова е нешто како во основно школо. Ланчата подготвена за домашниот шампионат „Трофео Ланча Рели“, во себе има турбо мотор со три цилиндри и нивна работна зафатнина од 1,2 л, 212 КС, механички диференцијали со ограничено пролизгување и обичен менувач со пет брзини. Секој што сака да се натпреварува во тој шампионат ќе треба да си купи еден примерок, а цената е 75.000 евра. Ако за „ланча ипсилон рели 4 хф“ треба да платите толку, а всушност е помагало со кое го совладувате основното школо, тогаш замислете колку чини еден автомобил што се натпреварува во Светскиот шампионат во рели. На времето (во 2002 година) „форд фиеста“, подготвена за рели група „н“, значи скалило подолу од тие во СШР, со погон само на предна оска и две подвозја, едното за асфалтно, а другото подготвено за макадам рели чинеше 250.000 долари.
Покрај рели изведбата, Ланча ја претстави и друмската, таа со дури 280 КС, именувана како „ипсилон ХФ“, врвот во понудата – од 0 до 100 км/ч за 5,8 секунди. Тоа подразбира пошироки траги од тркалата и пониска поставеност.
За нештата да бидат како што треба, повикан е легендарниот рели шампион Масимо Мики Биасион (најдобриот италијански рели возач со освоени две светски титули), да учествува во развојот и „финото навиткување“ на изведбата „рели ипсилон“. Да потсетиме, ената сигурно ќе биде така „малку посолена“ затоа што оваа марка е еден вид луксуз во семејството на Фиат, пардон, во семејството Стелантис. Фиат како народен автомобил, Алфа Ромео за тие со спортски дух, а Ланча настапуваше со префинет луксуз. Автомобили од средната класа немаа толку опрема колку што имаше во најмалиот модел со името Ланча. Единствено тие од високата класа имаа повеќе опрема. Затоа „ипсилон 10“ беше скап автомобил. Ништо поинаку нема да биде ни со најновиот наследник. Затоа да почекаме и да видиме колку ќе чини основната изведба („л икс“) кај нас.
ТОП НОВОСТИ
