Кога Ламборџини најави производство на ултра моделот „сиан“ во купе изведба, светот имаше што да види. На воодушевувањата им немаше крај затоа што новото купе имаше сосема нов дизајн, но во стилот на традицијата, во стилот на основачот на денешниот дизајн Марчело Гандини и неповторливиот „каунтач“. Убавите нешта се убави затоа што традицијата е вткаена во нив. Така е и со „ламборџини сиан купе“, автомобил, или неидентификуван движечки објект кој со својот громогласен V12 мотор предизвикува посебно чувство на стравопочит. Супериорниот мотор со работна зафатнина од 6,5 литри потпомогнат со лесен хибриден 48 волтен систем, испорачува вкупно 819 коњски сили на двете оски, односно погонот е на сите тркала преку седумстепен обичен но автоматизиран (полуавтоматски) менувач. Сето ова за фасцинантни максимални +350 км/ч и од 0 до 100 км/ч под 2,9 секунди. Овој модел не само што е најбрзиот откако постои работилницата во Санта Агата Болоњезе, туку е и најреткиот затоа што производството ќе запре на бројката од 63 примероци. Патем речено сите се распродадени, а повеќето од нив сè уште не се произведени. И како што вели народот, „железото се кова додека е жешко“, така и Ламборџини не дозволи неговиот „сиан“ да здивне, туку веднаш си даде задача да лансира уште поредок примерок „сиан роудстер“ кој ќе биде произведен во само 19 примероци и тоа без покрив. Имаме роудстери со, но овој е без покрив, наменет исклучиво за топлите и суви краеви на планетава. И овој модел веднаш беше распродаден и пред да биде официјално претставен. Се знае како одат тие работи, исклучиво за позната клиентела, верна на Ламборџини.
Во провинцијата Болоња на наречјето на кое говорат, за молња велат „сиан“, оттаму и името на најновиот моделна Ламборџини. И не случајно бојата на претставениот, фотографираниот модел е сино ураниумова, бојата на молњата.
Инспирацијата за главните контури е црпена од концептот „терцо миленио“, додека снажната движечка механика е позајмена од моделот „авентадор свј“ и кога на сето ова ќе го додадеме дизајнот од Митја Боркерт кој вели дека секој нов Ламборџини мора да ја следи „линијата гандини“ (средишната).
Ќе се произведат само 19 примероци со комбинирана силина 785 од моќниот 6,5 л V12 и 34 од електромоторот, а сето тоа е еднакво на рекордни 819 КС за еден Ламборџини и „привлечни“ 3,7 милиони долари (или повеќе) колку што ќе плати секој од 19-те сопственици. Убавите нешта се убави затоа што традицијата е вткаена во нив, а така е и со „ламборџини сиан роудстер“ кој преку дизајнот го има во себе духот на моделот „каунтач“.
ТОП НОВОСТИ
