На почеток од февруари, Киа пушти во етер фотографии од три електрични возила кои ќе бидат претставени на крајот од месецот поточно на 27. Само од патничкото доставно возило „пв 5“ имаше целосни фотографии, но од „ев2“ и „ев 4“ само половични. Но, Киа деновиве го обелодени моделот „ев 4“ со целосни фотографии.
Според обликот не е во ниту една група од популарните сув возила, како на пример, „ситикрузер“ „кросовер“ и останатите, но не е ни класична лимузина, туку нешто како караван со задна врата како „лифтбек“ линија или да речеме, во тој дел има црти од некогашната многу почитувана „сиера“ со пет врати во „режија“ на Форд. Нешто слично забележуваме и кај „цитроен ц 5“. Можеби ова е таа линија на идните возила кои ќе бидат именувани како лимузини.
За задвижување ќе бидат користени веќе постоечките електромотори, а и шасијата (платформата) е истата, „е – бмп“ на која веќе се конструирани „тројката“ и „петката“. И самата бројка, „4“, кажува дека моделот ќе ја надополни празнината помеѓу „ев 3“ и „ев 5“. Засега димензиите се непознати, но должината сигурно ќе биде некаде околу 4,45 м – колку за информација „ев 3“ и „ев 5“ ги имаат следните должини, 4,30 и 4,62 м.
Светска премиера е на 27 февруари, за време на настанот наречен Денови на електричните возила на Киа, локација Шпанија, крајбрежјето на Каталонија, во местото Тарагона, во изложбениот простор Тарако Арена.
ТОП НОВОСТИ
