Ако зборуваме за автомобилската индустрија, не смееме а да не ја спомнеме најмоќната каде се произведуваат и продаваат најмногу моторни возила во светот. Насетувате, тоа е Кина. Таму новите марки автомобили никнуваат како печурки по дожд, таква експлозија на нови марки и нови модели светот досега нема видено. Една од тие марки е Џетур во сопственост на гигантот Чери. Во месец април на Салонот за автомобили во Пекинг беше претставен концептот „џетур шанхаи т1“. Всушност тоа повеќе беше сериска изведба отколку концепт. И сегашниве фотографии го потврдуваат претходно напишаното. „Шанхаи т 1“ има дизајн кој многу потсетува на тие од класата на чисти теренски возила. Како што прават во прес известувањата веднаш да кажеме дека возилото има еден 10,25 инчен екран пред возачот (табла со инструменти) и еден 12,8 инчен централен осетлив на допир. Покрај нив тука се и камерите кои помагаат при паркирање, потоа разните електронски уреди итн. Важно во пакетот од електроника има речиси сѐ.
Новиот сув во семејството е сместен под „шанхаи т 2“, што значи дека е помал по димензии. Кога веќе ги спомнавме, да нагласиме дека „шанхаи т 1“ не е мало возило. Должина од 4,7 м спаѓа во класата на семејни возила. Широко е 1,97 м и високо 1,84 м.
Производителот најавува широка палета од погонски единици, на почетокот од продажбата ќе се вградуваат хибридни погони, бензински 1,5 л и електромотор, а подоцна ќе се вградуваат и другите мотори, најверојатно ќе бидат позајмени од поголемиот брат „т 2“. Иако „џетур шанхаи т 1“ е класифициран како сув, сепак во себе има „многу теренско“. Затоа се нагласени аголот на приод и аголот на заминување, 27 односно 25 степени, додека најниската точка од возилото во однос на подлогата е поставена на висина од 200 мм. Овие нешта кажуваат дека „шанхаи т 1“ има и тоа како добра теренска жила и секако ќе има изведби со погон на сите тркала. Штета што Џетур нема намера да го извезува моделот „шанхаи т 1“ на континентов, наменето е само за домашниот пазар. Засега е така, ќе видиме во иднина што ќе одлучат челниците во компанијата.
ТОП НОВОСТИ
