ВОЛВЕРЕ – ЈАС ТРКАЛАМ, СПАЛНАТА СОБА НАРЕЧЕНА ВОЛВО, „ЕСТЕЈТ“ ОДНОСНО КАРАВАНОТ НА ВОЛВО ЕДИНИЦА МЕРКА ЗА СЕМЕЕН АВТОМОБИЛ, ТЕШКАТА СПЕЦИФИКА ОД ДИЗАЈН НА МОДЕЛОТ „480“, ПОТОА „В 40“ НАЈДОБРИОТ МЕЃУ НАЈДОБРИТЕ ВО ЈАТОТО НА EURO NCAP И ЗА КРАЈ СЕТО ДОСЕГА КАЖАНО Е ПОТПИШАНО СО ЗБОРОТ БЕЗБЕДНОСТ
Штом се спомне името на тие автомобили, веднаш на сите им е јасно, зад тоа име стои зборот безбедност и квалитет. Името на автомобилите и зборовите безбедност и квалитет се поврзани уште од почетокот и тоа е така сè до денешен ден. Ако некоја марка полага толку многу внимание на безбедноста на патниците, тогаш тоа е Волво. Безбедноста е нераскинлив збор од патешествието на Волво уште од првиот произведен автомобил, поточно од пред 95 години (1927). Приказната за Волво датира од почетокот на ХХ век, 1911 год. кога компанијата СКФ одлучила да создаде нова серија лежишта (лагери). Одговорните во компанијата решаваат таа нова серија лежишта да ја нарече „волво“ и воедно за таа цел основаат посебен оддел и ја формираат марката Волво. Потеклото на тој збор доаѓа од латинскиот „волвере“, а во превод значи „јас тркалам“. Новиот модел лагери влегол во производство, но челниците ја напуштиле идејата да ги именуваат со зборот „волво“, односно топчестите производи и натаму го носеле името СКФ. Така се одвивале нештата тогаш во спомнатата компанија, но зборот „волво“, ново основаниот оддел и марката Волво останале во архивата на СКФ. Сега доаѓаат годините кога еден вработен во СКФ заедно со претставник од КТХ (Кралски технолошки институт) доаѓаат на идеја да создадат домашен автомобил. Асар Габриелсон е организатор за продажба во СКФ, додека Густав Ларсон е конструктор и вработен во институтот КТХ. Нивната желба за создавање автомобил од домашно производство тлеела подолго време, а созреала на почетокот од 20 години од минатиот век, односно во 1926 год. кога конструираат десет прототипови. Тие заедно со останатите вклучени во работата најнапред сакале да направат семеен автомобил, пред сè безбеден, а потоа и квалитетен кој ќе ги издржи нерамнините на лошите патишата и да може да се справи со суровите зимски услови кои владеат во скандинавските предели. Спомнатите параметри, ако можеме така да ги наречеме, им биле темел при создавањето на автомобилот. 14 април 1927 година ќе биде запишан во историјата на компанијата како ден за паметење, затоа што на тој ден од халата лоцирана во Гетеборг, излегол првиот сериски произведен автомобил со името Волво, моделот „ов 4“. Оттогаш до денешен ден поминале 95 години, а Волво сè уште ја исполнува заветнината, пред сè безбедност, а потоа и квалитет.
До крајот на првата година од производството биле направени 280 примероци од моделот „ов 4“ наречен „јакоб“. Волво не се потпрел исклучиво на автомобилите, во 1928 го претставува првиот камион именуван како „серија 1“. Занимлив е податокот што камионите имале голем успех уште со првиот модел. Производството полека, но сигурно растело иако не со посакуваното темпо, но сепак се одвивало во нагорна линија. Колку за пример ќе го наведеме податокот од 1930 година кога биле произведени 639 автомобили. Во тој предвоен период камионите биле далеку попознати од автомобилите, дури и надвор од државата. Повоениот период е ера на автомобилите. Тогаш квалитетните и безбедни чуда на четири тркала ќе го добијат потребното внимание од публиката. Успехот на Волво во предвоениот период главно се темелел на „пв 651“ и секако камионите. Добрите продажни резултати и одличната финансиска состојба довела до купување на компанијата Пентаверкен која дотогаш била снабдувачот на Волво со мотори. Оттогаш Пентаверкен е во јатото на Волво и така е до денешен ден.
АВТОМОБИЛ ЗА НАРОДОТ
Во 1932 год. Волво ја достигнува бројката од 10.000 произведени автомобили. Сите оддели на компанијата биле задоволни од тоа како се поставени работите, но иако од финансиска гледна точка сè било во ред, сепак една карика од синџирот не била на исто мислење со останатите. Тој дел од синџирот се продавачите на автомобилите Волво кои барале од челниците и конструкторите да создадат евтин автомобил покрај скапите лимузини. Тие го нарекувале „автомобил за народот“, а одговорните им излегуваат во пресрет и во 1936 година го претставуваат моделот „пв 51“. Многу сличен по дизајн на поголемиот и поскапиот „пв 36“, но со помалку опрема.
Во тој период производството почнало да се намалува се повеќе како резултат на приближувањето на Втората светска војна. Откако поминал црниот период за светот, Волво многу рано и брзо го обновува производството, затоа во неговата историја е запишано појавувањето на моделот „пв 444“ во 1944 година. Тој модел е токму наменет за народот, едноставен, практичен, рационален со скромни димензии и автомобил кој можел да одговори на сите барања на едно семејство. Моделот „пв 444“ бил молскавично прифатен и поволните финансиски движења не изостанале.
Во 1949 се појавува караван изведбата именувана како „пв 445 дует“. Овој караван е првиот во семејството, каросериска изведба која подоцна ќе стане своевиден втор заштитен знак на шведскиот производител. Во 1958 год. на моделот „пв 444“ му се придружува моделот „пв 544“ кој има сличен дизајн, но е подолг и поширок со поудобен оддел за патниците.
Две години пред појавувањето на овој сличен модел, Волво пушта пробен балон со класична лимузина и современ дизајн. Класиката од лимузина е „п 1200“, односно „п 120 амазон“. Пробен балон затоа што Волво внесе сосема поинаков дизајн од дотогашниот и сакаше да види како моделот најнапред ќе се снајде на домашниот пазар. Овој сосема нов модел до пред извесно време можеше да се види и низ улиците на државава. Во тоа време, 1956 година, се појавува и кабриолетот „спорт п 1900“. Поволните финансиски движења во ’50 и ’60 години од минатиот век условиле компанијата да создаде стабилна основа за понатамошен развој, а водечки модели кои придонеле за благосостојбата во компанијата се: „пв 444“ заедно со караван изведбата „пв 445 дует“ и сличниот на нив, но поголем и поудобен, моделот „пв 544.
Откако е создаден современиот дизајн, се мисли на класичната лимузина со три простори, на Волво му се отворени вратите кон современите дизајнерски решенија. Новиот популарен модел „амазон“ од 1956 година добива втора генерација но со две врати, во 1961 година именувана како „п 130 амазон. Во таа 1961 година Волво го претставува купето „п 1800“ едно од најбавите во автомобилската индустрија. Речиси во исто време „амазон“ добива караван изведба, но не со име „дует“, туку „естејт“, односно „п 220 амазон естејт“. Втората половина од ’60 години е позната по појавувањето на уште еден модел кој го прославил името Волво. Тоа е моделот „144“ и неговите подизведби „142“, караванот „п 145“ и луксузниот „164“.
Првиот краван (естејт) во семејството Волво, моделот „пв 445 дует“
Во ’70 години претставен е директниот наследник на 144, моделот „244“ и караванот „245“. Луксузот, исто така, добива наследник, моделот „264“, замена за „164“. Тука Волво прави место за соло играчите кои наместо лимузини повеќе сакаат купе, но во рангот на луксузната лимузина „264“ – во 1977 лансиран е купе моделот „262 c“.
Најмалите во семејството многу добро се снаоѓаат покрај поголемите, најнапред 140, потоа замената беше означена како 240, а потоа на ред стаса 340, за некаде по осум години да биде заменета со „четири стотките“. Тука некаде доаѓа и серијата „700“ нов чекор, поголем, кон луксузот и напад во горната средна и високата класа.
Во 1985 Волво неочекувано за конкуренцијата се појавува моделот „480“, со типичен комбилимузински заден дел, невообичаено остар и спуштен преден дел и прв Волво со погон на предните тркала. Овој дизајн на Џон де Врис под раководство на Роберт Кох тогашен прв човек во дизајнерскиот оддел во Недкар, Холандија, и за денешни услови е еден од најнапредните, а не пак тогаш во 1985 год. Тешка специфика од модел, препознатлив насекаде и отскокнуваше со дизајнот од дотогаш севкупното семејство на Волво. Посебно занимливи беа озборувањата за овој модел кој неретко беше нарекуван шведски автомобил со јапонски дизајн. Е сега имаме една „математичка непозната“, првите цртежи од моделот „480“ се појавиле во 1979 година и сè до 1981 не се знаело дали ќе влезе во сериско производство.
КОЈ ОД КОГО ПРЕПИШУВАЛ?
Кога сме веќе во класата погоре, во луксузната, Волво во 1991 год. го лансира моделот „850“, првиот со погон на предни тркала од високата класа, замена за „900“ односно „940“ и „960“, По него доаѓа „с 80“ и подоцна „с 70“ и „в 70“, а меѓу нив и „ц 70 купе“ преубав примерок кој беше основа за кабриолет изведбата „ц 70 конвртибл“ (1997 – 2003). Тука некаде се надзира падот на острата линија толку препознатлива за Волво. Култен дизајн, наречен од љубителите на автомобилите „волво дизајн“, но тогашните челници мислеа поинаку. Затоа многумина таат за грешка во чекори на дизајнерскиот оддел. И до денешен ден препознатливата „волво линија“ не е вратена. Сегашните модели сè повеќе се заоблени и како да се претопуваат со едноличноста на облиците со другите автомобили. Има по некоја нота на таа препознатлива линија, но не е тоа тоа што би требало да биде.
Волво в 40“ автомобил со највисоки оцени откако постојат испитувањата во лабораториите на Еуроенкап
Волво во соработувал со повеќе производители. Имало комбинација да биде во заедништво со домашниот ривал СААБ – Сканија во 1977, но ништо не се случило. Во таа деценија Волво започнува соработка со Рено, а во 1978 год. Волво Кар Корпорејшн се издвојува од Волво Груп. Тогаш Рено купува мал дел од акциите на Волво и соработката се продлабочува. Рено ќе помогне во доменот на компактните автомобили, а Волво за возврат ќе помогне во делот со лимузините. Соработката одела дотаму што двете компании одлучиле стратешки да се врзат и да продолжат заеднички. Идејата била прифатена од страна на Рено и неговите акционери, но тоа не поминало во таборот на Волво. Сепак од таа соработка Рено ги има доведено своите автомобили да бидат безбедни до крајни граници, а сведок за тоа се тестирањата извршени во Еуро НКАП и освоените пет ѕвезди на полето на безбедноста од страна на речиси сите модели на рено.
Волво соработувал и со Митсубиши. Заеднички вложуваат во една фабрика од ДАФ и таму Митсубиши ја произведува „каризмата“, а Волво моделот „с 40/в 40“. Таа фабрика била именувана како Недкар.
Мал семеен Волво, модел „440 глт“ од 1988 год.
Во 1999 Волво е купен од Форд за 6,45 милијарди долари, така што сега во јатото наречено Премиум Аутомотив Груп покрај Јагуар, Ленд Ровер и Астон Мартин се наоѓа и Волво. Денес работите се поинакви. Преголемиот развој на автомобилската индустрија во Кина услови појава на моќни компании. Една од нив е Гили која во моментов е сопственик на повеќе автомобилски марки меѓу кои и Волво. Денес Волво е еден од производителите кои прават најбезбедни автомобили, а можеби е и на врвот од тој список. Неговиот начин на работење и опстојување доволно кажува за тоа како треба да се чува традицијата и главните одлики кои го одбележале не само името Волво, туку и изминатите 95 години. Така е тоа во средините каде заветот и традицијата се чуваат љубоморно и се надоградуваат со секој изминат ден. Заветот што го оставиле Асар Габриелсон и Густав Ларсон сè уште е присутен, како вчера да е даден, а новите генерации одговорни умеат да го чуваат, негуваат и унапредуваат. Доказ за претходно напишаното е следново, втората генерација на „волво в 40“ доби највисоки оценки кои некогаш биле издадени од ЕуроНКАП. Историјата не памети некој автомобил да добил толку високи оценки за безбедност како моделот „в 40“. Од 1944 до денес Волво во своите автомобили вградил повеќе од 60 безбедносни чинители, што од свое производство, што позајмени од другите производители. Овие спомнати нешта ретко ќе ги сретнете во автомобилите од другите производители.
Некаде во ’50 години од минатиот век, за удобен автомобил се сметал тој во кој патниците може да преспијат. Кај кабриолетите важело нешто слично, односно ако може возилото да послужи како кревет тогаш таа предност ќе биде искористена при рекламирањето на моделот. Волво си прави приказна според која моделот „пв 544“ е исто толку удобен како при возењето така и при спиењето. За таа цел не само што седиштата биле прилагодени од страна на конструкторите да имаат својство на вистински кревет, туку Волво тргнал да оди уште подалеку – заедно со автомобилот продавал и ќебиња со заштитниот знак.
ТОП НОВОСТИ
