Хјундаи и натаму „гази“ без разлика на збиднувањата во светот, си ја гледа својата работа и сега во месецов се огласи со затскриена фотографија од новиот модел „јоник 6“. Така прави Хјундаи, најнапред ја заскокоткува јавноста со неколку затемнети фотографии на кои се гледаат само силуети, а потоа следи светската премиера.
Како што вели производителот, целосно електрифицираниот автомобил „јоник 6“ ќе наликува на концептот „професи“ прикажан во март 2020 година. Лимузината со меки линии ќе биде направена на платформата „е – гмп“, а таа истата во моментов ја користат: „јоник 5“, „киа ев 6“ и „генезис гв 60“. Со 73 kWh батерија лимузината ќе може да измине над 500 км со едно полнење. За почеток Хјундаи подготвува две изведби, со еден и со два електромотори, односно со силина од 215 КС или 308 КС во лимузината со двоен електромотор.
Во внатрешноста нема да недостасува дигиталната технологија, а тука се и системите за стабилност за против пролизгување и системите за против блокирање.
Како што тргнале работите, лимузината „јоник 6“ ја очекуваат да биде за првпат изложена на Салонот за автомобили во Париз некаде на крајот од летово или на некоја помала изложба во домашно опкружување. Што и да се случи, Хјундаи подготвува рано есенска светска премиера.
ТОП НОВОСТИ
