Дали ви е познато од некаде името „Фокскон“? Не можете да се сетите? Дозволете да ви помогнеме. Телефоните од марката Епл, не ги прави Епл, туку Фокскон. Епл прави прототип целуларен телефон, потоа го тестира и подготвува за сериско производство. Оттука натаму работата ја презема Фокскон и на крај телефоните стигнуваат во продавниците.
Приказната не застанува со телефоните, туку оди натаму и произведува автомобили. Откако електромоторите станаа главни во светот, Фокскон тргна да направи свој автомобил и притоа создава марка Фокстрон. Малку чудно но вистинито, од телефонист до производител на автомобили и не само тоа, туку од корен сѐ да развие, а дизајнот да го довери на Пининфарина. Деновиве Фокстрон го прикажа пред светската јавност својот трет концепт и како и досега Пининфарина го има последниот збор. Зборуваме за концептот „модел д“, еднопросторно патничко возило со седум седишта и 0,23 неверојатен коефициент на отпор на воздухот. Должината од преку пет метри му овозможува убаво испеглан коефициент на отпор на воздухот, но пред сѐ и над сѐ обликот ја дава таа бројка 0,23. Димензии: должина 5.195 мм, ширина 1.995 и висина 1.785. Тука некаде се сместени седумте седишта 2+2+3 и секако неизбежните екрани каде ќе можете да ги гледате вашите омилени серии.
„Фокстрон модел д“ е наменет за долги патувања, со едно полнење на батеријата изминува 660 км, а најголемата придобивка е тоа што загадувањето од бучава е доведена на ниски занемарливи децибели. Тоа што не се загадува воздухот, тоа е малку дискутабилно. За да произведете беспрекорно „чиста струја“, потребно е да потекнува од обновливи извори на енергија: сонце, ветар, бранови итн.
Од Фокстрон сѐ уште не најавуваат кога ќе се случи сериското производство на еднопросторниот прототип „модел д“, но едно е сигурно, компанијата сериозно влегува во автомобилската индустрија.
ТОП НОВОСТИ
