СО ВТОРАТА ПОБЕДА ВО ГОДИНЕШНИОТ ШАМПИОНАТ НА EXTREME E ТИМОТ НА VELOCE RACING ГО ТРАСИРАШЕ ПАТОТ КОН ТИТУЛАТА, ДОДЕКА ПОТТИКНУВАЊЕТО НА ЕКОЛОШКАТА СВЕСТ ЗА ПРОБЛЕМИТЕ СО КОИ СЕ СРЕЌАВА НЕДОПРЕНАТА ПРИРОДА НА СЕВЕРОТ НА ШКОТСКА ЈА ОДБЕЛЕЖА ЦЕЛТА НА ОДРЖУВАЊЕТО НА ВТОРИОТ НАСТАН ОД КАЛЕНДАРОТ
Најзелениот шампионат во мотоспортот Extreme E кој трета година по ред го обиколува светот подигајќи ја свеста за климатските промени и нивното негативно влијание врз планетата по една година пауза се враќа на домашно тло во Велика Британија. Втората трка од годинешниот шампионат се вози на најсеверниот дел од островот, поточно во Шкотска каде промотивниот карактер на Extreme E треба да помогне во создавањето на зелена енергетска централа и зачувување на видот на Атлантскиот лосос.
Шкотска е позната по своите природни убавини. Дом е на диви планини, длабоки долини, благо заоблени ридови кои личат како да се тркалаат до бесконечност и едно од најубавите крајбрежја во Европа. Во Шкотска се наоѓа и прочуената Каледониска прашума која се вбројува во неколкуте преостанати прашуми на тлото на Европа. Богатството од природни убавини со себе носи и богатство од жив свет како надалеку прочуениот шкотски црвен елен, златните орли, видрите кои единствено живеат во чисти води и распространетите колонии на фоки. Меѓутоа, трендот на затоплување кој најмногу се чувствува во последните две декади и преместувањето на дождовната сезона многу влијае на водостојот во реките и покачувањето на температурата на водата. Ова посебно негативно влијае на реката Нит во која се мрести Атлантскиот лосос. Со акцијата на Extreme E се активира пошумувањето на регионот што ќе придонесе за намалување на температурата на водата, и се обезбедува опрема за контрола на загадувањето на реката Нит, со цел враќање на Атлантскиот лосос во водите на Шкотска.
Трасата од патеката по која се вози трката минува и низ окното на стариот затворен рудник на јаглен од отворен коп во една од најсеверните области на Шкотска наречена Дамфрис и Геловеј. Интересно е што рудникот наскоро ќе се претвори во зелена електрична централа со фарма од ветерници за струја, додека окната во рудникот ќе се искористат како резервоари за изградба на хидроелектрична централа. Тимот на X44 Vida Carbon Racing стартуваше со победа на предизвикот во Шкотска. Победи на првата од двете планирани трки, поточно на третата трка од сезоната, додека тимот на Veloce Racing победи на четвртата трка. По триумфот на отворањето на сезоната во Неом, ова е втора победа за Veloce Racing годинава со која тимот полека го трасира патот кој води кон шампионската титула.
Стартот на Шкотското Икс-при започна со откажување на првата квалификациска сесија заради густата магла која го оневозможи летот на медицинскиот хеликоптер кој постојано бдее над екипажите во трка. Одложувањето на стартот дополнително ја подгреа возбудата во кампот на Extreme E. Тимовите беа нестрпливи да покажат што знаат и по кревањето на маглата тргнаа во акција.
Во квалификациите за првата трка во првата сесија победија минатогодишните шампиони тимот на X44 Vida Carbon Racing. Тимот водеше од старт до цел без поголеми проблеми следен од тимот на No.99 GMC HUMMER EV Chip Ganassi Racing. Третото место го освои тимот на Andretti Altawkilat Extreme E откако по замената успеа да го престигне тимот на Acciona Sainz. Втората сесија мина во знакот на тимот Rosberg X Racing, додека тимот на Carl Cox кој дебитираше на минатата трка полека почна да го пече занаетот и заврши втор што беше доволно да се пласира во големото финале. Тимот на Carl Cox освои исто број на бодови со тимот на Neom McLaren Extreme E, но заради казната во квалификациите тој не успеа да влезе во големата трка. Сепак, му остана да ја брани честа во Трката за искупување каде влегоа уште тимовите на Acciona Sainz, Veloce Racing, JBXE и ABT Cupra XE. Меѓутоа учеството на ABT Cupra не беше загарантирано бидејќи во втората квалификациска серија Клара Андерсон го удри својот Odyssey 21.
Доминацијата на квалификациите, тимот на X44 Vida Carbon Racing ја повтори и во Големото финале. На стартот Јамајчанецот Фрејзер Мекконел, се послужи со еден трик. Тој не го употреби својот хипер-погон кој смее да се користи кус временски интервал. И место да се катапултира на старт брзајќи кон првото свртување Мекконел демнеше последен. Ја искористи помалата брзина за да сврти потесно од останатите и изби напред. Веднаш по свртувањето го вклучи својот хипер-погон и ја поведе трката. Но, радоста траеше кратко бидејќи на следното свртување преголемата брзина го натера на широко свртување оставајќи му простор на Тими Хансен од Andretti Altawkilat Extreme E да прејде во водство. Во борбата за прво место се вмеша и Јохан Кристоферсон од тимот на RXR, но во жарот на борбата тој удри во брег крај патеката. Од ударот неговиот Odyssey 21 се лансираше во повеќекратно превртување по што за тимот трката беше завршена. Останатите два тима Carl Cox и GMC HUMMER возеа далеку одзади без можност да ги загрозат водечките. Тимот на Andretti Altawkilat мина прв низ целта, но заради прекршување на правилата во зоната на замена доби казна од 15,3 секунди кои го вратија на втората позиција. Така тимот на X44 Vida Carbon ја наследи победата, а Andretti Altawkilat мораше да се задоволи со второто место. Тимот на Carl Cox заврши трет освојувајќи го својот прв подиум во шампионатот, а GMC HUMMER беше четврти.
Во Трката за искупување за првпат од почетокот на шампионатот се најдоа тимовите на Veloce Racing и на Acciona Sainz. Оваа трка беше прилично непозната територија за двата тима бидејќи досега тие секогаш возеа во трките за големото финале. Сепак, за сè има првпат. На стартот се појавија само четири тима бидејќи возилото на ABT Cupra не можеше да се поправи. Трката ја поведе Veloce Racing со Кевин Хансен зад волан кој како молња изби напред веднаш по стартот. Но, заради големата брзина со која влезе во водениот премин ја загуби инерцијата и дозволи да го престигне Матијас Екстром од Acciona Sainz. Шпанскиот тим потоа не дозволи да биде загрозен и победи. Veloce Racing заврши втор. Нивната борба и резултатот наликуваа на збиднувањата од втората трка во Неом кога Acciona Sainz го доби Veloce Racing. Во оваа трка тимот на Neom McLaren заврши трет, а тимот на JBXE четврти.
Втората трка од ова Хидро Икс-при на Шкотска, или четвртата трка од сезоната, приреди уште поголеми изненадувања. Интересно и во двете квалификациски сесии победата ја однесе тимот на GMC HUMMЕR пласирајќи се директно во големото финале. Веднаш зад нив беше тимот на Veloce Racing кој после пехот на претходната трка се подготвуваше за победа, а тимот на Neom McLaren како да ја научи лекцијата од претходната трка и успеа да се пласира како трет. Четврти и петти беа тимовите RXR и Acciona Sainz кои иако не ја завршија втората квалификациска сесија бидејќи се судрија оштетувајќи ги возилата, сепак имаа доволно бодови од првата сесија за да влезат директно во финалето на Големата трка. Затоа, пак, тимовите на Andretti Altawkilat, Vida Carbon, JBXE, Abt Cupra и Carl Cox мораа да се задоволат само со пласманот во Трката за искупување. Исто така, беше знак прашалник дали возилото на тимот Carl Cox ќе стартува на трката заради оштетувањата кои ги претрпе во втората квалификациска сесија.
Соодветно на предвидувањата тимот на Veloce Racing со Кевин Хансен и Моли Тејлор зад волан на Odyssey 21 се закити со втората победа годинава. Хансен и Тејлор водеа од старт до финиш не дозволувајќи никој да ги загрози ниту по замената. Интересно за првпат Големото финале се возеше на пороен дожд. Лошите услови му дозволија на тимот на Veloce Racing да се стекне со предност на почеток од трката. Престигнувањето беше скоро невозможно. Затоа успеаја да ја одржат разликата во однос на тимот на Neom McLaren во текот на целата трка и завршија на највисокото скалило на пиедесталот. Тимот на Neom McLaren ја задржа втората позиција освојувајќи го својот втор подиум од почетокот на одржување на шампионатот. Трет заврши тимот на GMC HUMMER со нов екипаж составен од Американците АрЏеј Андерсон и Аманда Соренсен кој го освои својот прв подиум во Extreme E. Тие го искористија исходот од борбата меѓу тимовите RXR и Aciona Sainz. Нивните возила настрадаа во меѓусебниот дуел и го отворија патот за американскиот тим да застане на подиум. Тимовите RXR и Aciona Sainz не ја завршија трката.
Трката за искупување стартуваше без возилото на тимот на Carl Cox. Техничарите не успеаја да ги поправат оштетувањата направени на квалификациите. Тажен крај со оглед дека во претходната финална трка се качија на подиумот. Со неверојатно брз старт тимот на JBXE ја поведе трката и веднаш создаде предност која на врнежливото време беше тешко достижна. Веднаш зад нив се нацрта тимот на Andretti Altawkilat кој ја искористи можноста да го престигне возилото на ABT Cupra со Насер АлАтија зад волан. Во обид да направи нешто повеќе Фрејзер МекКонел од Vida Carbon удри во возилото на ABT Cupra, а потоа одлета во балите сено крај патеката завршувајќи ја трката рано со видни оштетувања на нивниот Odyssey 21. Како напредуваше трката беше јасно дека тимот на JBXE ќе се закити со првата победа во сезоната. Тимот на Andretti Altawkilat остана на втората позиција, додека тимот на ABT Cupra после судирот успеа да го доведе возилото до третата позиција.
После извозени четири трки од вкупно десет колку што бори шампионатот на Extreme E годинава, тимот на Veloce Racing води убедливо во генерален пласман со 80 освоени бодови, а зад нив се наоѓа тимот на Acciona Sainz со 69 бода. На трето место е тимот RXR со 52 бода, четврти е тимот X44 Vida Carbon со 51 бод, а GMC HUMMER со своите 50 бодови се наоѓа на петтата позиција во генерален пласман.
Следно во календарот е т.н. Исланд Икс-При на Сардинија кое се вози на 8 и 9 јули годинава. Ова Икс-При втора година по ред е дел од календарот на Extreme E, а минатата сезона победата ја освоија тимовите на GMC HUMMER и на RXR.
ТОП НОВОСТИ
