Верувал или не, Дачија повторно оди во светскиот шампионат во рели на издржливост, вклучувајќи го и прочуеното рели Дакар. Малку е чудно што оваа марка има многу малку искуство во автомобилскиот спорт и сега одеднаш оди во класата каде владеат големи пустински ѕверки. Дачија не, но затоа „газда“ Рено е стар волк на релито Дакар. Има три победи, една со Клод Маре во 1982 и две со легендата Жан Луј Шлезер во 1999 и 2000 год. Потоа Рено одлучи Дачија да се појави на релито во 2013 во Ј. Америка со Емилијано Спарато. Сето тоа траеше до 2018, со најдобар пласман на 14 место.
Не само што Дачија влегува во релито Дакар од 2025, туку и потпишува договори со Себастијан Лоеб деветократниот шампион во Светскиот Шампионат во Рели (од 2004 до 2012) и совозачот Фабијан Лурник, потоа Насер Ал Атија петкратен победник на релито Дакар и совозачот Матео Баумел и за крај на возачкиот дел потпишува со Кристина Гутиерез Херера и совозачот Пабло Морено Хуете.
Дачија не е сама во тој „бал“. За сите нешта да бидат под контрола ќе се грижи ни помалку ни повеќе туку Продрајв, најпознатата работилница во светот на релито. Благодарение на оваа работилница, Митсубиши е најтрофејната марка на релито Дакар со 12 титули. И сега тој ист Продрајв ќе се грижи и за Дачија. Лудница од тим. И уште една информација, Н. Ал Атија ќе вози за тимот на Продрајв Хантер на релито Дакар 2024 и токму тој тим е еден од фаворитите.
Трите екипажи ќе имаат прилика да учествуваат директно во развојот на возилото, тестирајќи го цела 2024, најмногу во мароканскиот дел од Сахара. Чудата не завршуваат тука, следно е тоа што возилото ќе користи посебно гориво, односно синтетичко. Ќе биде занимливо да се следи работата на овој тим, затоа што многу звучни имиња се собрани во него и сигурно многу пари ќе бидат вложени за тимот да биде хармонизиран.
ТОП НОВОСТИ
