ДВА ТУРБОКОМПРЕСОРА, КОЛЕНЕСТО ВРАТИЛО, 16 ЦИЛИНДРИ ВО W – ШТО Е ТОА? МОТОР ШТО СЕ ВГРАДУВА ВО АВТОМОБИЛИТЕ „БУГАТИ“, ТАКА? ПА, ТОЈ МОТОР НЕКОЈ ГО СТАВИЛ ВО РАЧЕН ЧАСОВНИК.
Шеснаесет цилиндри поставени во формација на „w“ – двојно „v“. Ништо ново и ништо чудно. Во моментов тој агрегат е сопственост на компанијата „ВАГ“, а се вградува во автомобилите од марката „Бугати“. Сега на ред доаѓа несекојдневното, чудното и малку повеќе ексцентрично. Ако приказната за агрегатот одеше само во правец за вградување во автомобил, тогаш мозаикот ќе беше целосен, но што ако некому му текне тој мотор да го вгради во рачен часовник? Светов стана каприциозен и што не ќе му текне да направи. Некому на ум му паднала идеја споменатата погонска единица да ја вгради во рачен часовник и да го пушти во продажба. Зошто приказната отишла во сосема друга насока (читај во насока на хронометрите)?
Една фирма за часовници, „Јакоб и компанија“, нашла заеднички интерес со прочуената компанија „Бугати“ и сега соработуваат. Со заеднички сили досега успеале да направат три часовници вклучително и овој најновиот именуван како „Јакоб и компанија бугати чирон турбилон“. Како што претходно споменавме, часовникот има 16 цилиндри поставени во двојно „v“ и секако задолжително е да биде присутно и коленестото вратило што е направено од нерѓосувачки челик. Ќе беше капак на сè ако ги имаше и четирите вентили на секој од цилиндрите, но ги има турбоком- пресорите на број два. Е тука погрешиле. Моторот, тој W16 има четири, а не два турбо- компресора. Токму од таа причина навреме ќе ги известиме надлежните и одговорните за изработка и составување на часовникот, а во дописот ќе им биде нагласено каков пропуст направиле.
Се прашувате како мотор да биде вграден во рачен часовник. Таква инспирација добиле во фирмата „Јакоб и компанија“ и сето тоа го преточиле во часовник со вкупно 578 дела. Телото е направено од титаниум, а за неговата цврстина говорат четирите амортизери што се грижат за стабилноста на часовникот и наедно за издржливост на снажни удари. Телото на часовникот е прекриено со сафирно стакло што овозможува беспрекорна видливост од сите агли. Часовникот е така изработен да има способност да ја поништи Земјината тежа (гравитацијата). Поради тоа, Земјината тежа не влијае врз часовникот и неговата прецизност при мерењето на времето.
Чудото од мерач на време е направен рачно и во известувањето за јавноста е наведена цена од 280.000 долари. Цената и не е толку висока и спектакуларна колку што се чудни и ексцентрични часовникот и неговата механика. И замислете, часовникот ќе се произведува сè додека за него постои интерес кај купувачите. Во превод тоа значи дека нема ограничување на производството, нема ограничени серии и некој посебен ексклузивитет. Кој сака може во секое време да го нарача несекојдневниот „јакоб и ко. бугати чирон турбилон“.
При купување „бугати чирон“ не помислувајте на добивање часовник како подарок од куќата – купив автомобил, а продавачот ќе ме почести со рачен часовник или да помислите часовникот оди заедно со автомобилот, како да влегува во неговата цена. Не, дами и господа, ќе одделите дополнителни 280.000 долари и дури тогаш часовникот ќе биде ваш. Цената на минијатурниот часовник не е ништо посебно во однос на цената на автомобилот „бугати чирон“, само три милиони долари (односно секој коњ ве чини по 2.000 долари) и одвојувате дополнителни 10 отсто за часовникот. Едно прашање – часовникот или „мекларен 720 с“? „Наравоучение“, притискате копче одговорно за придвижување на коленестото вратило и клиповите ќе почнат да се движат низ цилиндрите. Глетката е несекојдневна и исто толку каприциозна за 280.000 долари.
ТОП НОВОСТИ
