Безмалку сите производители на автомобили полека ги отстрануваат обичните менувачи и ги заменуваат со автоматски. И БМВ почна така да прави, но некои од купувачите негодуваа.
Производителите мора во понудата да имаат и обичен и автоматски менувач. Е сега со автоматскиот, преносите се побрзи, само милисекунди се потребни и со тоа автомобилите имаат подобри забрзувања, на пример од 0 до 100 км/ч, но и потрошувачката на гориво е за нијанса пониска. Сепак за некои возачи обичниот менувач е врвот и тоа мора да биде почитувано од производителот. Купувачите се секогаш во право, така вели старото трговско правило.
За моделската 2025 година, БМВ реши да го врати обичниот менувач во луксузниот мал двосед, моделот „з 4“, поточно во најпрестижната изведба „з4 м40 и“. Кабриолетот „бмв з4 м40и 6 мт“ располага со 3,0 л. мотор кој во себе има шест цилиндри во линија и двоен турбо полнач, развива 340 КС и 500 Нм максимален вртежен момент, погон на задна оска, забрзување од 0 до 100 км/ч за 4,6 сек. и обичен менувач со шест преноси – убавина. Вистинска најава за тие што обожуваат префинет роудстер. Уште малку остана од зимата, така што сега е вистинско време за подготвување план за купување мал отворен автомобил, се разбира двосед. Изборот е ваш, кому како му се допаѓа, дали обичната или најбрзата со „моторспорт“ изведба, сеедно, најважно е тоа што БМВ се надминал себе си со моделот „з 4“ и затоа уживањето е загарантирано.
ТОП НОВОСТИ
