ЗА МНОГУМИНА ПРОЛЕТТА Е ВИСТИНСКО ЗАДОВОЛСТВО КОГА ВО ТОПЛИТЕ ДЕНОВИ МОЖЕ ДА СЕ УЖИВА ВО ПРИРОДАТА. НО, ЗА МНОГУМИНА ОВА ГОДИШНО ВРЕМЕ Е ВИСТИНСКО ИЗМАЧУВАЊЕ ЗАТОА ШТО ДИШЕЊЕТО ИМ СТАНУВА ОТЕЖНАТО, КАШЛААТ, КИВААТ, ИМ ТЕЧАТ СОЛЗИ, А СЀ ТОА Е ПРЕДИЗВИКАНО ОД ЦВЕТНИОТ ПРАВ.
Се проценува дека околу 15-30 отсто од населението во светот страда од некаква форма на алергија и оваа болест сè повеќе се јавува кај младата популација во развиените земји и кај населението во урбаните средини. Алергијата претставува прекумерен одговор на нашиот одбранбен имунолошки систем на инаку нештетни супстанци од животната средина. Од штетните супстанци организмот се штити со специфични одбранбени механизми, а еден од нив се состои во опколување на антигените со антитела и нивно неутрализирање. При првиот контакт на антигените, кој се нарекува и алерген, со антителата не настанува алергиска реакција, туку само сензибилизација т.е. создавање на специфични антитела на соодветниот алерген. При повторниот контакт на антителата со алергенот се развива алергија. Антителата циркулираат преку крвотокот и така доаѓаат до различни ткива, каде ги активираат клетките наречени мастоцити, кои тогаш ослободуваат хистамин. Хистаминот е една од супстанците кои предизвикуваат воспалителна реакција на ткивото, што се манифестира како црвенило, јадеж, исцедок од носот, солзење, отежнато дишење. Интензитетот на овие појави зависи од одговорот на имунолошкиот систен на алерген. Други симптоми се егзема, уртикарија, лупење на кожата, кашлање, непрекинато кивање, како и потешки компликации во вид на астма или анафилактичен шок. Кај лицата кои не се алергични, одбранбениот систем ги запомнил алергените како нештетни супстанци, па затоа и не презема ништо при контактот со нив. Кај алергичните лица имунолошкиот систем бурно реагира како да се работи за инфекција, па така настануваат симптомите на алергија.
Модерната медицина сè уште не може да предвиди како ќе се развива алергијата, така што нејзиниот интензитет во текот на животот може да биде променлив. Алергиските болести можат да се поделат на оние кои го зафаќаат системот за дишење, алергиски конјуктивит, кожни алергии, алергиски реакции на храна, на лекови и на убод од инсекти. Алергиските реакции на системот за дишење можат да бидат сезонски кои обично се јавуваат во период од годината кога започнува поленацијата на некои од стеблата, или да се јавуваат во текот на цела година. Понекогаш е навистина тешко да се разликуваат симптомите на сезонската алергија од обичната настинка или вирозата. Алергијата предизвикува кивање, затнатост, течење на носот, јадеж во пределот на очите и на ушите, болки во грлото. Всушност, на настинка упатуваат симптомите, како зголемена температура и кашлање, меѓутоа по кратко време тие спонтано исчезнуваат, за разлика од симптомите на алергија кои траат значително подолго и најчесто се смируваат откако ќе се употребат соодветни лекови. Имено, алергијата може да биде предизвикана и од домашен прав, од пердуви, сонце, разни метали како сребро и никел (накит), синтетика, прав (најлош е правот од патиштата), животински влакна…
Со оглед на тоа дека алергијата не може да се излекува, лекувањето се темели на одбегнување на алергени и земање лекови за ублажување на симптомите. Најчесто тоа се антихистаминици, кортикостероиди, а може да се примени и лекување со хипосензибилизација (имунотерапија) т.е. вбризгување на растечки концентрации на алергени под кожата еднаш до два пати седмично во текот на 3-5 години. Антихистаминиците од постарата генерација се најчесто препорачувани лекови кои помагаат при појавата на алергии предизвикани од цветен прав, но воедно тие можат и да манифестираат и одредени нус појави, кои се исклучително неповолни за возачите, кај кои во текот на возењето, поради нивно дејство, може да се појави поспаност, бавност, намалена способност за запазување.
НА ЛИЦАТА КОИ СТРАДААТ ОД АЛЕРГИЈА ИМ СЕ ПРЕПОРАЧУВА:
• Да ја следат биопрогнозата.
• Во периодот на висока концентрација на цветен прав да избегнуваат престој на отворено и напорни физички активности, затоа што тогаш засилено се дише па поголемо количество од цветниот прав навлегува во дишните патишта (на село и во природа концентрацијата на цветен прав е повисока наутро, а во градот навечер).
• На оние кои се алергични на цветен прав им се препорачува да шетаат откако ќе престане дождот и тогаш да ги проветрат просториите.
• Облеката не треба да се суши на отворено.
• Косата треба да се мие пред спиење.
• Во спалната соба не треба да се остава облеката со која сте биле надвор.
• Потребно е да се користат очила наместо контактни леки или очила за сонце кога се престојува на отворено.
• Препорачливо е на годишен одмор да се оди кога дома е сезона на цветниот прав и да се избере место со помалку алергени, на пример, острови, брегови или високи планини.
ЗА АЛЕРГИЧНИ ВОЗАЧИ:
• Возењето кога се има алергија од цветен прав може да претставува голем проблем поради кивањето, постојаното течење на секрет од носот, јадежот, солзењето на очите, дури и отежнатото дишење. Доколку можете препорачливо е да се возите на совозачкото место, а во случај, пак, ако морате да возите задолжително затворете ги прозорците.
• Доколку системот за вентилација во вашиот автомобил нема филтер за цветен прав, секако треба да го поставите.
• Возачите особено се предупредуваат да бидат внимателни кога употребуваат антихистаминици, лекови кои најчесто се препишуваат за оваа алергија. Имено, поради нивното влијание врз мозокот тие манифестираат нус појави кои се особено непожелни кај возачите: поспаност, бавност, намалена способност за запазување. На некој начин тие лекови делуваат на мозокот како алкохол, што е докажано.
• Доколку сте алергични на цветен прав, а не сакате или не можете да се откажете од возењето ви се препорачува навреме да ја почнете терапијата. Својот доктор треба да го предупредите дека сте возач, за тоа да го има предвид при препишувањето антихистаминици, а доколку во аптека сами купите некој лек потребно е фармацевтот да предупредете на тоа. Задолжително прочитајте го упатството во лекот и запознајте се со нуспојавите. Никогаш не е премногу ако сте внимателни.
ТОП НОВОСТИ
