Безбедност во сообраќајот-СОСТОЈБАТА Е ПОВЕЌЕ ОД АЛАРМАНТНА

КОЛКУ И ДАЛИ ВООПШТО ГИ ПОЧИТУВАМЕ СООБРАЌАЈНИТЕ ЗНАЦИ, ОДНОСНО СЕМАФОРОТ И НЕГОВАТА ЦРВЕНА БОЈА? СПОРЕД ТОА ШТО НИ СЕ СЛУЧУВА КАТАДНЕВНО ВО СООБРАЌАЈОТ, СИТЕ ДОАЃАМЕ ДО ИСТ ЗАКЛУЧОК – СОСТОЈБАТА Е ПОВЕЌЕ ОД АЛАРМАНТНА

Семафор, направа поставена на крстосница, која го регулира минувањето на пешаците, велосипедистите и моторните возила. Накусо така може да се опише, односно дефинира семафорот.

Првиот светлосен сигнален уред во светот е направен пред повеќе од еден век, во 1912 година од Лестер Вајр, полицаец во Солт Лејк Сити, во државата Јута. И првиот уред, прототипот, за регулирање на сообраќајот, ги имал истите бои како и денешниот уред наречен семафор – црвената и зелената. Светлосна сигнализација во форма на семафори, за првпат била поставена на една крстосница во Кливленд, Охајо.

Набрзо сите градови во САД почнале да ја употребуваат едноставната, но ефикасна направа за регулирање на сообраќајот на крстосниците. Денес, бројот на семафори не е познат, но сигурно е позната нивната беспрекорна полезност. Нивната работа на сите нам ни е многу добро позната. Тие се дел од нашето секојдневие и без нив не се може. Доколку се почитуваат боите, црвената и зелената, сè ќе биде под контрола. Е да, само што тоа „доколку се почитува“, на нашиве улици се почесто сме сведоци на „непочитува“.

Што точно носи непочитувањето на боите од семафорот, на сите ни е и повеќе од јасно, но и покрај тоа има возачи кои ја минуваат крстосницата и на црвено. Нема семафор во градов на кој не се „шлепаат“ три до четири возила откако ќе се запали црвеното и не дај боже да се најдете во тие моменти на среде пешачки – постојат идеални шанси да настрадате. Се пали зеленото светло, а вие како пешак тргнувате и одеднаш на пола метар од вас се појавува автомобил, камион, мотоцикл и не ви е јасно што се случува. Набрзина се преслушувате во само неколку мигови и доаѓате до сознанието дека тој со моторното возило ја минува крстосницата на црвено.

Само што сте го преживеале првиот, стигнува вториот шок. Првото само што ви поминало пред нос, еве уште едно „ауто“ ви минува пред вас. И така едно три четири пати се штрекнувате и шокирате.

Состојбата на крстосниците е катастрофална и крајно небезбедна. И после се прашуваме зошто ни се случуваат толку многу сообраќајки на крстосниците. Секојдневно сме директни сведоци на претходно наведените случувања, но нештата си остануваат исти и никако не се менуваат на подобро. Свеста на учесниците во сообраќајот е на многу ниско ниво и затоа постои големо непочитување на сообраќајните правила, односно на семафорските бои. Севкупно ситуацијата на крстосниците е повеќе од алармантна и треба да се делува веднаш и тоа оштро и на прва.

Жарко Атанасоски