КАКО ШТО ХИГИЕНАТА Е ПОЛОВИНА ЗДРАВЈЕ, ТАКА И РЕДОВНОТО СЕРВИСИРАЊЕ И ПРОВЕРКАТА НА МОТОРНОТО ВОЗИЛО СЕ ПОЛОВИНА БЕЗБЕДНОСТ. БИДЕТЕ ВНИМАТЕЛНИ И СЛЕДЕТЕ ГИ УПАТСТВАТА НА ПРОИЗВОДИТЕЛОТ ЗАТОА ШТО ТИЕ ГАРАНТИРААТ БЕСПРЕКОРНА РАБОТА И ДОЛГОВЕЧНОСТ НА ВОЗИЛОТО И, ПРЕД СÈ, ЗГОЛЕМЕНА БЕЗБЕДНОСТ ВО СООБРАЌАЈОТ.
Секоја направа треба да биде сервисирана, односно да се направат проверки со цел да се види дали сè уште е исправна за употреба. Сето тоа се препорачува само поради една и единствена причина, а тоа е безбедноста.
На почетокот ќе ја споменеме воздухопловната индустрија во која проверките и сервисите за исправноста се исклучително строги. Откако ќе биде произведен некој дел, веднаш се врши проверка. Посебни лица прават тестови на тој дел. Зошто е така во оваа индустрија? Затоа што таму нема поправен испит. Кога новиот авион ќе излезе од производната хала, не оди во продажба, туку во него седнува пробен пилот што врши детална проверка. По неколкудневната проверка сопственикот го добива авионот. Потоа сите функции на авионот повторно ги проверува пилотот што ќе управува со него. Сите проверки се прават за да бидат откриени и отстранети недостатоците. Зошто? Заради поголема безбедност. Сето ова треба и мора да се применува и во секојдневјето со автомобилите. Често слушаме приказни дека „автомобилот е сè уште нов, нема потреба да оди на редовен сервис и проверка“. Ова се случува откако ќе помине гаранцијата.
Додека автомобилот е во гарантен рок, сопственикот мора да го носи на редовен сервис затоа што гаранцијата нема да важи ако не се придржува кон правилата на производителот. Поради оваа причина секој сопственик на нов автомобил ги почитува правилата, но штом ќе помине гаранцијата, тогаш дел од сопствениците се однесуваат неодговорно кон своите „другари“ на четири тркала.
Редовниот сервис и проверката може само да бидат од голема полза. Не треба да се чека редовен сервис за да се провери дали автомобилот е исправен. Може да се направат и вонреден сервис и проверка. Барем тоа е едноставно. АМСМ ја има таа практика со децении. Закажете термин во АМСМ Сервис и автомобилот ќе биде целосно проверен,а дополнително ќе ве информираат доколку има потреба од дополнителна интервенција.
Неразбирливо е автомобилот што го возите секојдневно да го оставите несервисиран и непроверен покрај денешната нова технологија. Проверката и сервисирањето се завршуваат за еден-два дена, а со тоа вие и другите учесници во сообраќајот добивате врвна безбедност. Секое влегување во автомобил носи одредено ниво на ризик, но тој ризик може да се сведе на минумум, да биде занемарливо мал. Безбедноста во сообраќајот е клучна за сите. Кога возите автомобил, тогаш ова мора да го имате постојано на ум. Правилно проверениот и сервисираниот автомобил игра клучна безбедносна улога во сообраќајот.
Нејасно е зошто некои возачи не ги менуваат старите и истрошени пневматици, истрошените зглобови, лагери, рамена, амортизери… и покрај тоа што знаат за неисправноста на автомобилот, но и натаму го возат без грижа на совеста.
Автомобилот е тој што има тркала и тој вас ве вози, а не вие него. Ако го чувате, ќе ве чува и тој. Однесете го автомобилот на редовен, но и на вонреден сервис за да биде позабавно патувањето. Придржувајте се кон строгите правила за редовно сервисирање и проверки за да бидете сигурни дека вашето моторно возило, автомобил, мотоцикл, автобус, никогаш нема да ве остави на пат.
ТОП НОВОСТИ
