Безбедност во сообраќајот-МОТОЦИКЛИСТИТЕ И ПРИМЕРНОТО ОДНЕСУВАЊЕ

МОТОЦИКЛИТЕ СЕ ВЕЧНА ТЕМА КОГА ЌЕ СЕ СТОПЛИ ВРЕМЕТО. ЗА ЛИЦАТА СО СЛОБОДЕН, АВАНТУРИСТИЧКИ ДУХ ВОЗИЛОТО НА ДВЕ ТРКАЛА Е ВИСТИНСКИОТ ИЗБОР, НО ЗА НИВ Е ЗАДОЛЖИТЕЛНА ДИСЦИПЛИНАТА.

Некои премногу ги сакаат, други не можат да ги поднесат, а оние што еднаш ќе почнат да возат мотоцикл, едноставно засекогаш се приврзуваат кон металниот убавец на тркала.

Како и за секое превозно средство, така и за ова не е доволна само умешност за возење, туку добар мотоциклист е тој што располага со неопходна дисциплина. Колку и да се мотоциклистите слободоумни и диви, тие мора да имаат високо ниво на дисциплина за да се одржи безбедноста. Да почнеме со опремата. Заштитниот шлем е задолжителен. Тој може да го заштити возачот од инсекти, прав и друг материјал. Исто така, шлемот го заштитува мотоциклистот при незгода. Шлемот е број еден опрема за безбедноста на возачот и на совозачот.

Потоа е заштитната облека. Препорачливо е да се носат панталони или комбинезон и јакна наменети за мотоциклистите. Тие заштитуваат од студ и од дожд, но и од повреди. И облеката е уште еден елемент на безбедноста.

Мотоциклот мора редовно да се сервисира. Синџирот мора да се одржува беспрекорно чист, пневматиците да бидат прописно напумпани, никако да не се вози со стари и изабени затоа што тие се клучни за безбедноста. Доколку се придржувате кон овие правила, ако умеете да возите мотоцикл, задолжително мора да ги почитувате и сообраќајните правила, сигнализацијата и, секако, секогаш да ја приспособувате брзината на условите на патот и да бидете внимателни и да возите безбедно.

Возењето треба да биде задоволство, а не преземање непотребен ризик. Исто така, мотоциклистите мора да се придржуваат кон сообраќајната култура, да не возат на пешачки зони, да не се тркаат по градските улици, да не вртат на полни линии, да внимаваат, да не создаваат бучава. Уживајте и возете во природа.

Секој учесник во сообраќајот мора да покаже сообраќајна култура и да ги почитува прописите. Невниманието и недисциплината скапо чинат, а сметката за тоа ја плаќаат токму возачите, за жал, дури и со животот.

Секоја почит за мотоциклистите што се пример како треба да се вози. Учете од нив. Не предизвикувајте проблеми и не преземајте ризик што ќе го доведе во опасност вашиот и животот на другите учесници во сообраќајот.

Жарко Атанасоски