ОТКАЖЕТЕ СЕ ОД НАМЕРАТА ДА ВОЗИТЕ ВО НОЌНИТЕ ЧАСОВИ. СО ТОА ЌЕ ГО ПОШТЕДИТЕ ОРГАНИЗМОТ ОД ДОПОЛНИТЕЛНИ СТРЕСОВИ, А РИЗИКОТ ОД СООБРАЌАЈНА НЕЗГОДА ЌЕ ГО НАМАЛИТЕ ДО КРАЈНИ ГРАНИЦИ. ДЕНСКОТО ВОЗЕЊЕ Е НАЈБЕЗБЕДНО И ВИ ПРЕПОРАЧУВАМЕ ДА НЕ ГО ЗАМЕНУВАТЕ СО НОЌНОТО
Според науката, ноќта како дел од деноноќие, отсекогаш кај човековиот род предизвикувала доза на прикриен страв. Истражувањата покажале дека тој страв, прикриен или не, кога се наоѓаме во мрак, всушност потекнува од дамнешни времиња кога човекот живеел во пештери. Кога мракот го заменувал денот, човекот веднаш се криел во природните засолништа, а тоа било гаранција за неговиот опстанок, односно нема да биде најден од предаторите.
Денешните предатори за човекот се автомобилите, посебно во ноќните часови. Е сега тој страв од ноќта се манифестира и доживува како стрес, како нелагодно чувство додека возиме по автопат или по градските улици. Науката вели дека човечкото тело поинаку се однесува додека вози преку ден, а поинаку за време на вечерните часови. Таа доза на прикриен страв постојано е присутна во текот на ноќното возење. Во зависност од единката, тој страв односно стрес, различно се чувствува, некој помалку некој повеќе, но без исклучок е присутен кај сите возачи.
Стресниот момент постигнува кулминација кога на патот приметуваме (или ни се причинува) дека има нешто, независно дали е предмет или живо суштество. Секој возач кога ќе го чита текстов ќе се присети на моментите кога при ноќно возење приметил дека на асфалтот има нешто. Токму тој прв момент на изненадување за возачот претставува дополнителен стрес. Во само неколку мигови, мора молскавично да реагира да избегне судар, а сето тоа се манифестира со побрзо чукање на срцето, адреналини итн. Лекарите за овој момент имаат повеќе да кажат за тоа што се случува во организмот.
Кој е лекот за горенаведените ситуации? Производителите на моторни возила вградуваат системи кои откриваат сè што се наоѓа на патот. Преку посебни сензори и камери поврзани со централна единица, откриваат што се случува на асфалтот и го предупредуваат возачот со звучен и визуелен сигнал, а доколку возилото продолжи да се движи со иста брзина, централата автоматски ја намалува брзината односно го запира возилото доколку е тоа потребно.
Избегнувајте го ноќното возење и нема да доживувате дополнителни стресови. Со тоа го штедите организмот. Ноќното возење е голема загатка и најдобро е да го одложите и да си тргнете на пат денски. Ова истото го препорачуваме на тие кои патуваат на поголеми дестинации.
Човечкиот организам со милиони години живеел со ист ритам и сега во последниве неколку десетлетија, ноќта ја користи за било какви потреби. Тоа го прави поради поинаквите прилики во општеството и брзиот развој. Сето тоа е добро, но организмот се формирал со милиони години и не може сега одеднаш да ги прими тие нови случувања – ноќна активност. Ноќта со себе носи големи ризици и крајно време секој што ќе одлучи да вози во ноќните часови, да си ја преиспита одлуката и да се откаже од намерата.
ТОП НОВОСТИ
