Безбедност во сообраќај-ВОЗЕЊЕТО АВТОМОБИЛ ВО ЗИМА ПРЕТСТАВУВА СВОЕВИДЕН РИЗИК

СПОРЕД НАУЧНИТЕ СОЗНАНИЈА, ВОЗАЧИТЕ МНОГУ ПОБРЗО ГИ ЗАБЕЛЕЖУВААТ ПЕШАЦИТЕ ШТО НОСАТ ОБЛЕКА ВО СВЕТЛИ БОИ ОТКОЛКУ ВО ТЕМНИ. СВЕТЛИТЕ БОИ ПРЕТСТАВУВААТ УБАВА КОНТРАСТ НА ЗИМСКОТО СИВИЛО, ОТСКОКНУВААТ ОД СРЕДИНАТА И ЗАТОА СЕ ПОЗАБЕЛЕЖЛИВИ ЗА ВОЗАЧИТЕ

Студениот период носи дожд, мраз, снег, повеќе сивило, повеќе облачни денови, денот е пократок, побрзо се стемнува, а кога е облачно претежно владее сивилото. Сè ова мора да се сфати најсериозно затоа што ако не бидеме доволно внимателни, може да се случат несакани настани во сообраќајот. Поради тоа, возењето автомобил во зимските месеци претставува своевиден ризик. Клучен елемент во сообраќајот се децата како пешаци. Сите сме сведоци на недисциплината на возачите и на нивната дрскост, особено кога ги употребуваат мобилните телефони. За вакви возачи е мала секоја казна.

ПЕШАЦИТЕ СЕ ПРВИ НА УДАР

Во зимското сивило, особено наутро и доцна попладне многу потешко може да се забележат пешаците, особено ако улицата е неосветлена и ако тие носат темна облека. Тогаш возачите многу потешко може да ги видат пешаците и да ја приспособи брзината. Многу важно за сите пешаци е да носат облека со светли бои. Кај нас речиси 90 отсто од возрасните носат облека со темни или сиви бои, а тоа го применуваат и кај децата. Всушност, децата мора да носат облека со светли тонови, топли бои. Таквите светли, јаки, топли бои претставуваат голем контраст на зимското сивило и возачите побрзо ги забележуваат.

Науката вели дека возачите многу побрзо ги забележуваат пешаците што носат облека со светли бои отколку со темни. Ваквата препорака за облеката важи за сите годишни времиња, особено за зимскиот. За подобра заштита на децата препорачливо е да носат, на пример, зелени, жолти, црвени, јакни и капути. Секое учество во сообраќајот носи и ризик, но може да го сведеме на најниско ниво ако се обрне повеќе внимание на преминувањето улица, да се носи облека во светли бои, возачите да не користат мобилни телефони и да не ја надминуваат максимално до 50 км/ч во градски средини.

На возачите им препорачуваме да ја почитуваат дозволената брзина и повеќе да внимаваат ако има деца во близина на улицата. Ако возите над дозволената брзина, шансите навреме да ги употребите сопирачките се многу помали, а зимското сивило придонесува за состојба со зголемен ризик. Учеството во сообраќајот мора да се сфати најсериозно за да се сведе ризикот на минимум и да се придонесе за поголема безбедност.

ТРОТОАРИТЕ ПРЕТВОРЕНИ ВО ПАРКИНЗИ

Во Скопје, а веројатно и во другите градови преовладува чудно „правило“ во однос на тротоарите што со децении се користат како место за паркирање на автомобилите, а пешаците се истерани на улица и се движат заедно со моторните возила. Ваквата состојба со тротоарите директно ги загрозува децата. Движењето по пешачките зони претставува посебна опасност поради тоа што таму има секакви мотоцикли, а често може да се видат и автомобили. Многу често и до оградите на кафулињата може да се видат паркирани мотоцикли. Крајно време е тротоарите и пешачките зони да им се вратат на пешаците.

Жарко Атанасоски