BeyonCa е нов производител на автомобили, поточно на електромобили, од Кина чија цел е прво на домашниот пазар да се впушти во напад на премиум сегментот каде владеат марки како Audi, BMW, Mercedes-Benz и Porsche, а малку подоцна да се впушти во освојување и на пазарите во Југоисточна Азија, Блискиот исток и во Европа.
Името на марката BeyonCa доаѓа од „Beyond the Car” или „Далеку над автомобил“, и е поддржана од Renault и од Dongfeng Motor. А, водена е од искусната рака на шефот на Renault Chinа, Су Вејмин, поранешен раководител на високи позициии во Daimler и во Volkswagen. Планот е отприлика за две години отсега, некаде во 2024 година на пазарот да се испрати луксузната електрична спортска лимузина наречена GT Opus 1 чиј концепт веќе е претставен пред светската јавност.
Во BeyonCa се свесни дека се соочуваат со сериозна конкуренција и затоа во овој врвен производ имплементираат технологии кои досега никој не ги користел во автомобилската индустрија. Најинтересна технологија е вградениот систем за дијагноза на здравјето на возачот и патниците како и можноста за онлајн консултации со лекари за време на патувањето. Сензори во кабината ги следат отчукувањата на срцето, крвниот притисок, температурата и други параметри врз основа на кои го информира дежурниот лекар на BeyonCa кој дава соодветни совети за постапување. Во случај на итност BeyonCa го вклучува автопилотот кој безбедно го носи автомобилот до целта.
GT Opus 1 работи на систем од 800 Волти и има батерија со капацитет од 130 kWh. Во луксузно скроената кабина има одвоени седишта за четири патници кои уживаат во полн комфор. Перформансите засега не се обелоденуваат, но затоа се знае дека развојот на GT Opus 1 го водат поранешниот член на бордот на VW, Кристијан Клингер, поранешниот шеф на развој на Audi, Ханс-Јоаким Ротенпилер и поранешниот дизајнер на Bentley, Дирк ван Брекел. Цената на BeyonCa GT Opus 1 би почнувала од 137.000 долари.
ТОП НОВОСТИ
