ПРЕД КУСО ВРЕМЕ, ROLLS-ROYCE MOTORS CARS ГО ПРЕТСТАВИ НОВИОТ УНИКАТЕН МОДЕЛ, КРЕИРАН ВО СОРАБОТКА СО РЕНОМИРАНИОТ ЈАПОНСКИ АРХИТЕКТ КЕНГО КУМА. BESPOKE ROLLS-ROYCE DAWN СОВРШЕНО ЈА РЕФЛЕКТИРА ФИЛОЗОФИЈАТА КОЈА СТОИ ЗАД НОВАТА ЛУКСУЗНА РЕЗИДЕНЦИЈА THE KITA, СМЕСТЕНА ВО ЦЕНТРАЛНИОТ ДЕЛ НА ТОКИО, ШТО ЈА ДИЗАЈНИРАЛ КУМА.
Уникатниот Rolls-Royce го нарачал сопственикот на уникатниот пентхаус на повеќе нивоа, наречен The Kita Tea House, кој своето име го добил по чајџилницата на покривот од каде што се пружа неверојатен поглед на Meiji храмот и националниот стадион на Јапонија, кој исто така, го реновирал Кума.
Уникатниот Dawn е, всушност, дело на Bespoke Rolls-Royce отсекот и се одликува со специјален Silver Haze финиш на екстериерот што ги претставува структурните елементи на јадрото на објектот. Оваа интригантна боја го открива својот бронзен сјај кога ќе се најде под директна сончева светлина, имитирајќи го бронзениот Koshi параван на екстериерот на градбата и деталите со ист тон сместени во ентериерот. Природните панели од т.н. царски костен во задниот дел ги поврзуваат екстериерот и ентериерот, создавајќи изглед на богати панели што будно го посматраат влезниот хол на пентхаусот.
Внатре, сивиот „селби“ кожен тапацир е нагласен со арктичко бели и црни детали, придружени со сиви појаси. Предната маска има градиентен финиш, што е првпат за Rolls-Royce. Хоризонталните омбре премини од пијано „селби“ сиво до пијано црно создаваат уникатен ефект. На маската, исто така, се направени и неколку интарзии од нерѓосувачки челик, кои го претставуваат логото на The Kita. Мотивите можат да се забележат и на потпирачите за глава на предните седишта. Покрај тоа, уникатниот Rolls-Royce Dawn доаѓа и со специјално дизајнирани Bespoke часовник и чадор, чија боја совршено одговара со неговиот ентериер.
„Ова е првпат да учествувам во проект од ваков тип и горд сум што го направив тоа баш за Rolls-Royce, компанија која ја ценам поради традицијата и желбата да го прикаже најдоброто кога се работи за природните материјали. Rolls-Royce ја внесе суштината на The Kita проектот во својот автомобил, дозволувајќи му на сопственикот на скапиот пентхаус да ужива во него каде и да оди. За мене голема чест е тоа што го видов автомобил кога пристигна во Токио, неговиот дом“, изјави архитектот на промоцијата на Bespoke Rolls-Royce Dawn.
ТОП НОВОСТИ
